Almatyda Qarǵaly shaǵynaýdanyndaǵy aialdamada 66 jastaǵy áieldi aiaýsyz urǵan er adamǵa sot úkimi shyqty. Sot ony bir jylǵa bas bostandyǵynan aiyrdy, dep habarlaidy dalanews.kz.
Oqiǵa 23 sáýirde tańerteń Almatydaǵy aialdamalardyń birinde bolǵan edi. Áielge jasalǵan shabýyl beinebaqylaý kamerasyna túsip qalyp, videosy áleýmettik jelide taraǵan bolatyn. Oqiǵa qoǵamda úlken rezonans týdyrdy.
Is materialdaryna sáikes er adam esh sebepsiz egde jastaǵy áielge shabýyl jasap, onyń basy men betinen judyryqpen 5-6 ret uryp, sondai-aq, denesi men basynan birneshe ret tepken.
Saldarynan áieldiń basy men betinde kóptegen jaraqat paida bolǵan. Sot-meditsinalyq saraptama onyń densaýlyǵyna jeńil ziian kelgenin anyqtaǵan.
Sot aiyptalýshyny Qylmystyq kodekstiń 108-1-baby 2-bóligi ("Buzaqylyq nietpen densaýlyqqa qasaqana jeńil ziian keltirý") boiynsha kináli dep tanyp, bir jylǵa bas bostandyǵynan aiyrdy.
Sondai-aq, sot jábirlenýshiniń azamattyq talabyn qanaǵattandyrdy. Sottalǵan er adamnan 534 348 teńge materialdyq shyǵyn, ókil qyzmetine jumsalǵan 500 myń teńge jáne moraldyq ziian úshin 500 myń teńge óndirildi.
