Abai kúni qarsańynda Almaty qalasynda ashyq aspan astyndaǵy sahnada myńdaǵan kórermender Qazaqstan Respýblikasy Mádeniet jáne aqparat ministrliginiń «Ulttyq kinony qoldaý memlekettik ortalyǵy» qoldaýymen túsirilgen Abaidyń tuńǵysh shyǵarmalar jinaǵynyń jaryq kórý tarihyn baiandaǵan «Alǵashqy kitap» atty derekti filmdi tamashalady, dep habarlaidy dalanews.kz.
Dokýdrama janryndaǵy bul derekti film qazaqtyń neshe ǵasyrlyq rýhani tarihyndaǵy tań qalarlyq uly oqiǵa - 1909 jyly Peterbor qalasynda Ilias Boraganskii baspasynan jaryq kórgen Abaidyń tuńǵysh kitabynyń qily taǵdyryn beinelegen.
Film jalǵyz ózi tutas bir álem jasap, shyǵarmashylyqpen ainalysqan nebári jiyrma jyldyń ishinde qazaqtyń tilin de, kórkemdik, etikalyq tanymyn da kúrt ózgertip, buryn-sońdy túrik jurty jetpegen biikke kótergen Abaidyń alǵashqy kitaby qalai basylyp shyqty, Abai kózi tirisinde óziniń shyǵarmalaryn jinaqtap, kitap qylyp shyǵarýǵa áreket etpedi me, jalpy, kitapty kim daiyndady, qalai baspa betin kórdi, nege Semeide emes, qiiandaǵy Peterborda basyldy, nege kitapty shyǵarý isinde kóptegen kedergiler paida boldy, t.t.s.s. saýaldarǵa jaýap izdegen eken.
Premera sońy Almaty qalasy ákimdiginiń Mádeniet basqarmasy uiymdastyrǵan Abai murasyn nasihattaǵan kontserttik baǵdarlamaǵa ulasty.
Talǵat Kúzembaev, Lidiia Kádenova, Erlan Bilál, Darhan Súleimenov, Asan Májit, Dinara Kemelhan, Erden Jaqsybek, «Alashuly» toby men Hor kapellasynyń qatysýymen mýzykalyq-poetikalyq qoiylym boldy.
Kesh ary qarai Abai kúnine arnalǵan, uly aqyn-aǵartýshynyń ánderi shyrqalyp, sózderi oqylǵan «Almaty summer fest» festivaline jalǵasty. Festivalde Maqpal Júnisova, Janar Duǵalova, Ashat Tarǵyn, Nurlan Berdibaev, Serik Isahan, Ayarai, Birzhan Demeuuly, Nurtore, Magsoul, «Kesh you», «6ellucci», «IL Canto», t.b. óner kórsetti.
Merekelik kesh sońynda myńdaǵan astam adam ashyq aspan astynda Abai ánderin birge shyrqady.
