Almatydaǵy Forum Almaty saýda-oiyn-saýyq ortalyǵynda kinoǵa barǵan 29 jastaǵy jigit qaitys boldy. Týystarynyń aitýynsha, ol popkornǵa qaqalyp qalǵan, dep habarlaidy dalanews.kz.
Oqiǵa 17 mamyr kúni bolǵan. Marqum kinoteatrǵa burynǵy synyptas qyzben birge kelgen. Seans bastalar aldynda ol popkorn satyp alyp, keiin qaqalyp qalǵan.
Týystarynyń sózinshe, áýeli jigittiń jaǵdaiy dárethanada nasharlaǵan. Ol jerde qusyp, keiin ózine jeńildep qalǵanyn aitqan. Osydan keiin ekeýi kino zalyna kirgen. Alaida biraz ýaqyttan soń jigit tamaǵy jybyrlap turǵanyn aityp, ózin jaisyz sezine bastaǵan. Keiin jaǵdaiy kúrt nasharlaǵan.
Jaqyndarynyń aitýynsha, ol birazdan keiin «júregim qysylyp tur» dep shaǵymdanyp, syrt kiimin qasyndaǵy tanysyna bergennen keiin esinen tanyp qalǵan. Oqiǵa kýágerleri dárigerler kelgenge deiin alǵashqy kómek kórsetýge tyrysqan. Biraq jigitti aman alyp qalý múmkin bolmaǵan.
Marqumnyń týystary bul qaiǵyly jaǵdaidyń aldyn alýǵa bolar edi dep esepteidi. Olardyń pikirinshe, eger janynda tunshyǵý kezinde durys kómek kórsete alatyn adam bolǵanda, jigitti qutqaryp qalý múmkin edi.
Oqiǵadan keiin áleýmettik jeli qoldanýshylary jigittiń ólimine ne sebep bolýy múmkin ekenin talqylai bastady. Keibiri onyń anafilaktikalyq shok alǵan bolýy yqtimal degen boljam aityp jatyr.
