Ýkrainadaǵy soǵysqa tartylǵan jeti Qazaqstan azamaty maidan shebinen shyǵarylyp, Reseidiń Voronej qalasyna jetkizilgen. Bul týraly zańger Meiirman Shekeev áleýmettik jelidegi paraqshasynda málimdedi.
Zańgerdiń aitýynsha, jeti azamat qazir soǵys aimaǵynan shyǵarylǵan. Ol olardyń jaqyn arada elge oralýy múmkin ekenin jetkizdi.
"Alla qalap balalardyń qazirgi tańda jeteýi soǵys shebinen aldyrylyp, Voronejge jetkizildi. Alla qalap elgede keler kúni de alys emes siiaqty. Laiym jaqsy jańalyq kóp bolǵai", – dep jazdy zańger.
Buǵan deiin Reseige jumys isteýge baryp, keiin Ýkrainadaǵy soǵysqa tartylǵan qazaqstandyqtardyń ata-analary Syrtqy ister ministrliginiń aldyna jinalǵan bolatyn. Olar balalaryn elge qaitarýǵa kómektesýdi surap, memlekettik organdarǵa ótinish bildirgen.
Osy oqiǵaǵa bailanysty qoǵam nazaryn aýdarǵandardyń biri – Shymkent turǵyny Symbat Keldibek. Ol 2006 jyly týǵan inisi Ainabek Keldibektiń taǵdyryna alańdap, kópshilikten kómek suraǵan edi.
Týystarynyń aitýynsha, Ainabek biyl maýsym aiynda Almatyda Ulttyq ulan qataryndaǵy áskeri boryshyn aiaqtaǵan. Al 27 tamyzda dosymen birge tabys tabý maqsatynda Reseige ketken.
Keiin áleýmettik jelilerde Reseige jumys izdep barǵan birneshe qazaqstandyqtyń soǵysqa tartylǵanyn aityp, elge qaitarýdy suraǵan beineúndeýleri tarady.
Osydan keiin azamattardyń jaqyndary quzyrly organdarǵa júginip, olardy qaýipsiz jerge shyǵarý máselesin kóterdi.
Meiirman Shekeevtiń sońǵy málimdemesine sáikes, jeti qazaqstandyq Voronejge jetkizilgen. Alaida olardyń Qazaqstanǵa naqty qashan oralatyny ázirge belgisiz. Bul málimetke qatysty resmi organdardyń rastaýy jariialanǵan joq.
