Qazaqstan Prezidentiniń keńesshisi ári baspasóz hatshysy Aibek Smadiiarov «Habar» agenttiginiń direktorlar keńesiniń múshesi atandy.
Tiisti aqparat agenttiktiń resmi saitynda jariialandy. Málimetke sáikes, Aibek Smadiiarovty direktorlar keńesiniń quramyna engizý týraly sheshimdi kompaniianyń jalǵyz aktsioneri 2026 jylǵy 2 qazanda qabyldaǵan.
Taǵaiyndaý №477-NQ buiryǵy negizinde júzege asyrylǵan.
Agenttik taratqan aqparatqa súiensek, Smadiiarovtyń «Habar» AQ-da jáne onyń úlestes kompaniialarynda aktsiialary nemese qatysý úlesteri joq. Sondai-aq ol agenttikke qyzmet kórsetetin uiymdar men básekeles kompaniialardyń aktsiialaryna ielik etpeidi.
Aibek Smadiiarov kim?
Aibek Smadiiarov 1983 jyly dúniege kelgen. 2004 jyly Abylai han atyndaǵy Qazaq halyqaralyq qatynastar jáne álem tilderi ýniversitetin támamdaǵan.
Eńbek jolyn 2005 jyly bastap, keiin Qazaqstan Syrtqy ister ministrliginde túrli qyzmetter atqarǵan. Vengriia men Vetnamdaǵy Qazaqstan elshilikterinde diplomatiialyq qyzmette bolǵan.
2018–2025 jyldary Syrtqy ister ministrliginiń baspasóz qyzmeti men aqparattyq qurylymdarynda basshylyq laýazymdardy atqardy.
2025 jyldyń jeltoqsanynda Prezident Ákimshiliginiń Ishki saiasat bóliminiń meńgerýshisi qyzmetine taǵaiyndaldy.
Al 2026 jylǵy 29 qańtarda Memleket basshysynyń ókimimen Qazaqstan Prezidentiniń keńesshisi – Prezidenttiń baspasóz hatshysy qyzmetine kiristi.
Smadiiarov I synypty Tótenshe jáne Ókiletti ýákil diplomatiialyq dárejesine ie. «Halyq alǵysy» jáne «Shapaǵat» medaldarymen marapattalǵan.
