Elordada ótip jatqan júzýden World Aquatics 2026 Álem kýboginiń finaldyq kezeńine qatysýshylar Astananyń kórikti jerlerin aralap, qalanyń týristik nysandarymen tanysty. Sportshylar «Báiterek» monýmentin, Táýelsizdik alańyn, Ulttyq mýzei jáne erekshe sáýletimen tanymal «Han Shatyr» saýda-oiyn-saýyq ortalyǵyn tamashalady, dep habarlaidy dalanews.kz.
Biyl Qazaqstanda alǵash ret uiymdastyrylyp otyrǵan World Aquatics Álem kýboginiń finaldyq kezeńine álemniń 39 elinen sportshylar qatysýda. Sheteldik sportshylardyń, jattyqtyrýshylar men jankúierlerdiń kelýi oqiǵalyq týrizmniń damýyna serpin berip, qonaqúilerge, kólik, ekskýrsiia jáne basqa da qyzmet túrlerine suranysty arttyrady.
Sheteldik qonaqtar Astananyń zamanaýi sáýletine, qalanyń kórki men abattandyrylýyna, qazaqstandyqtardyń qonaqjailyǵyna jáne elimizdiń bai mádeni murasyna erekshe tánti boldy.
Sonymen qatar sportshylar Qazaqstandy álemge tanytýǵa óz úlesin qosyp keledi. Olar áleýmettik jelilerde elimizden alǵan áserimen bólisip, sapary týraly jaqyndaryna áńgimeleidi. Osylaisha Qazaqstannyń týristik múmkindikterin halyqaralyq aýditoriiaǵa keńinen tanytýǵa yqpal etedi.
Aita keteiik, 2026 jyldyń basynda Týrizm jáne sport ministrligi alǵash ret óńirlerge týrister tartýǵa jáne oqiǵalyq týrizmdi damytýǵa baǵyttalǵan iri is-sharalardyń kúntizbesin bekitti. Kúntizbe aiasyndaǵy jumystar, aqparattyq súiemeldeý jáne óńirlermen birlesken is-qimyl is-sharalarǵa kelýshiler sanynyń artýyna yqpal etti.
Atalǵan jumystyń oń nátijelerin eskere otyryp, Ministrlik týristik is-sharalar kúntizbesin Qazaqstanda ótetin iri halyqaralyq sport jarystarynyń kestesimen úilestirý máselesin qarastyryp jatyr.
Bul bastama sporttyq jarystardy mádeni jáne týristik is-sharalarmen ushtastyrýǵa múmkindik beredi. Nátijesinde sportshylar men sheteldik qonaqtar jarystarǵa qatysyp, sporttyq básekelerdi tamashalap qana qoimai, elimizdegi mádeni is-sharalarǵa qatysýǵa, ulttyq dástúrlerimizben tanysýǵa jáne Qazaqstannyń kórikti jerlerin aralaýǵa múmkindik alady.
Atap aitqanda, 2027 jyly Qazaqstanda sporttyń alty túrinen álem chempionatyn ótkizý josparlanǵan. Astanada ústel tennisi men dziýdodan, al Almatyda stend atýdan álem chempionattary ótedi. Sondai-aq Astanada qazaq kúresinen, boks pen taekvondodan álem chempionattaryn ótkizý kózdelgen. Budan bólek, elimizde ÝEFA Kongresi ótedi. Bul da halyqaralyq deńgeidegi mańyzdy oqiǵalardyń biri bolmaq.
Álemdik deńgeidegi sporttyq jarystardy ótkizý elimizde sporttyń damýyna, Qazaqstannyń týristik tartymdylyǵyn arttyrýǵa, halyqaralyq bedelin nyǵaitýǵa jáne qyzmet kórsetý salasynyń órkendeýine de yqpal etedi.
