Allur ekojúiesi D. Serikbaev atyndaǵy Shyǵys Qazaqstan tehnikalyq ýniversitetiniń bazasynda Allur Isker óndiristik kafedrasyn ashady. Bul bastama Satbayev University-men dýaldy bilim berý júiesin qalyptastyrý tájiribesine jáne akademik Ó. A. Joldasbekov atyndaǵy Mehanika jáne mashinataný institýtymen ǵylymi yntymaqtastyqqa negizdelgen. Kelesi kezeńde óndiristiń naqty mindetteri men jergiliktendirý deńgeiin arttyrýǵa qajetti óńirlik injenerlik quzyretter damytylady, dep habarlaidy dalanews.kz.
ShQTÝ-men birlesip Germaniia men Koreia Respýblikasynyń tájiribesin zertteý osy jumystyń mańyzdy bóligi boldy. Kompaniia men ýniversitet úshin negizgi másele injenerlerdi daiarlaýdyń halyqaralyq tásilderin jáne ǵylym men ónerkásiptiń ózara bailanysyn Qazaqstan jaǵdaiynda qoldaný bolyp otyr. Óndiristik kafedranyń ashylýy osy jumystyń tájiribelik jalǵasy bolmaq.
Satbayev University-men yntymaqtastyq Allur kompaniiasyna ýniversitettegi bilim men óndiristik oqytýdy ushtastyrý boiynsha tájiribe jinaýǵa múmkindik berdi. Bul júiede kompaniia kásibi quzyretterdi qalyptastyrýǵa qatysady, al stýdentter alǵan bilimin naqty tehnologiialyq mindetterdi sheshýde qoldanady. Akademik Ó. A. Joldasbekov atyndaǵy Mehanika jáne mashinataný institýtymen ǵylymi bailanys bilim berý baǵytyn zertteý jumystarymen tolyqtyrady.
ShQTÝ bazasynda bul baǵyttar óńir ónerkásibiniń qajettilikterin eskere otyryp odan ári damytylady. Óndiristik kafedra mamandar daiarlaýdy, qoldanbaly zertteýlerdi jáne Allur kompaniiasynyń injenerlik mindetterin sheshýdi bir arnaǵa toǵystyrady.
Kafedranyń basty ereksheligi onyń tájiribelik baǵytta jumys isteýinde. Óndiristiń qajettilikteri oqý mazmunyn, stýdenttik jobalar men ǵylymi zertteýlerdiń baǵyttaryn aiqyndaýǵa negiz bolady. Kompaniia mamandary bolashaq injenerlerdi daiarlaýǵa, al oqytýshylar men zertteýshiler kásiporynnyń tehnologiialyq mindetterin sheshýge qatysa alady.
Allur úshin mundai tásil óndiristi jergiliktendirý deńgeiin arttyrýmen tikelei bailanysty. Bólshekter men quramdas bólikter óndirisin igerý úshin materialtaný, dánekerleý, mehanikalyq óńdeý, jabyndar, avtomattandyrý jáne sapany baqylaý salalaryndaǵy quzyretterdi damytý qajet. Kompaniia óndiristik kafedrany osy quzyretter naqty óndiristik úderistermen bailanysta qalyptasatyn alań retinde qarastyrady.
Bul jumys pánaralyq tásildi de talap etedi. Óndiristik mindetterdi sheshýge ártúrli baǵyttaǵy injenerler, ǵalymdar, oqytýshylar men stýdentter jumyldyrylady. ShQTÝ-dyń Smart Engineering quzyretter ortalyǵy, Profcoat qorǵanysh jáne fýnktsionaldyq jabyndar ǵylymi ortalyǵy men Luban Workshop alańy mundai ózara yqpaldastyqqa negiz bolady.
ShQTÝ men Allur ókilderiniń jumys kezdesýinde taraptar yntymaqtastyqtyń perspektivaly baǵyttaryn aiqyndady. Olardyń qatarynda bólshekter men quramdas bólikter óndirisin jergiliktendirý, óndiristik kooperatsiiany damytý, lazerlik jáne núktelik dánekerleý, mehanikalyq óńdeý men boiaý tehnologiialary bar. Avtomobil salasynda jasandy intellekt pen tsifrlyq tehnologiialardy qoldaný da jeke baǵyt retinde qarastyryldy.
Tájiribelik tetikterdiń biri retinde Allur kompaniiasynyń ǵylymi-tehnikalyq jáne óndiristik mindetter qoryn qalyptastyrý kózdelgen. Sonyń negizinde taraptar kásiporynda qoldanýǵa baǵyttalǵan zertteýlerdiń, oqý jobalary men injenerlik ázirlemelerdiń taqyryptaryn anyqtai alady. Bul stýdentterdi oqý barysynda naqty mindetterdi sheshýge tartyp, ǵylymi jumysty óndiris qajettilikterimen bailanystyrýǵa múmkindik beredi.
ShQTÝ Satbayev University-men birlesip injenerlik bilim berýdiń ulttyq modelin ázirleýge qatysyp jatyr. Óndiristik kafedra osy modeldi óńirlik deńgeide tájiribege engizýdiń bir tetigine ainalýy múmkin. Ol úshin óńirdegi qajettilikter men quzyretter kartasy naqty bilim berý baǵdarlamalaryna, zertteý mindetteri men ónerkásiptik jobalarǵa ainaldyrylady. Mundai tásil qazirgi kadr suranysyn ǵana emes, óndiris odan ári damyǵan kezde qajet bolatyn quzyretterdi de eskerýge múmkindik beredi.
Yntymaqtastyqtyń kelesi kezeńinde ShQTÝ delegatsiiasynyń Saran men Qostanaidaǵy Allur óndiristik alańdaryna sapary josparlanǵan. Tehnologiialyq úderistermen tanysý birlesken jobalardyń mindetteri men injenerlerdi daiarlaý mazmunyn naqtylaýǵa múmkindik beredi.
ShQTÝ bazasynda óndiristik kafedra ashý Allur ekojúiesi úshin injenerlik áleýetti damytýdyń zańdy jalǵasy sanalady. Dýaldy bilim berý tájiribesi, ǵylymi yntymaqtastyq jáne óńirlik ýniversitettiń múmkindikteri ortaq maqsatqa jumyldyrylady. Negizgi mindet óndiristi damytý men jergiliktendirý deńgeiin arttyrýǵa qajetti mamandar daiarlap, qoldanbaly sheshimder ázirleý bolmaq.
