Allur экожүйесі Д. Серікбаев атындағы Шығыс Қазақстан техникалық университетінің базасында Allur Іскер өндірістік кафедрасын ашады. Бұл бастама Satbayev University-мен дуальды білім беру жүйесін қалыптастыру тәжірибесіне және академик Ө. А. Жолдасбеков атындағы Механика және машинатану институтымен ғылыми ынтымақтастыққа негізделген. Келесі кезеңде өндірістің нақты міндеттері мен жергіліктендіру деңгейін арттыруға қажетті өңірлік инженерлік құзыреттер дамытылады, деп хабарлайды dalanews.kz.
ШҚТУ-мен бірлесіп Германия мен Корея Республикасының тәжірибесін зерттеу осы жұмыстың маңызды бөлігі болды. Компания мен университет үшін негізгі мәселе инженерлерді даярлаудың халықаралық тәсілдерін және ғылым мен өнеркәсіптің өзара байланысын Қазақстан жағдайында қолдану болып отыр. Өндірістік кафедраның ашылуы осы жұмыстың тәжірибелік жалғасы болмақ.
Satbayev University-мен ынтымақтастық Allur компаниясына университеттегі білім мен өндірістік оқытуды ұштастыру бойынша тәжірибе жинауға мүмкіндік берді. Бұл жүйеде компания кәсіби құзыреттерді қалыптастыруға қатысады, ал студенттер алған білімін нақты технологиялық міндеттерді шешуде қолданады. Академик Ө. А. Жолдасбеков атындағы Механика және машинатану институтымен ғылыми байланыс білім беру бағытын зерттеу жұмыстарымен толықтырады.
ШҚТУ базасында бұл бағыттар өңір өнеркәсібінің қажеттіліктерін ескере отырып одан әрі дамытылады. Өндірістік кафедра мамандар даярлауды, қолданбалы зерттеулерді және Allur компаниясының инженерлік міндеттерін шешуді бір арнаға тоғыстырады.
Кафедраның басты ерекшелігі оның тәжірибелік бағытта жұмыс істеуінде. Өндірістің қажеттіліктері оқу мазмұнын, студенттік жобалар мен ғылыми зерттеулердің бағыттарын айқындауға негіз болады. Компания мамандары болашақ инженерлерді даярлауға, ал оқытушылар мен зерттеушілер кәсіпорынның технологиялық міндеттерін шешуге қатыса алады.
Allur үшін мұндай тәсіл өндірісті жергіліктендіру деңгейін арттырумен тікелей байланысты. Бөлшектер мен құрамдас бөліктер өндірісін игеру үшін материалтану, дәнекерлеу, механикалық өңдеу, жабындар, автоматтандыру және сапаны бақылау салаларындағы құзыреттерді дамыту қажет. Компания өндірістік кафедраны осы құзыреттер нақты өндірістік үдерістермен байланыста қалыптасатын алаң ретінде қарастырады.
Бұл жұмыс пәнаралық тәсілді де талап етеді. Өндірістік міндеттерді шешуге әртүрлі бағыттағы инженерлер, ғалымдар, оқытушылар мен студенттер жұмылдырылады. ШҚТУ-дың Smart Engineering құзыреттер орталығы, Profcoat қорғаныш және функционалдық жабындар ғылыми орталығы мен Luban Workshop алаңы мұндай өзара ықпалдастыққа негіз болады.
ШҚТУ мен Allur өкілдерінің жұмыс кездесуінде тараптар ынтымақтастықтың перспективалы бағыттарын айқындады. Олардың қатарында бөлшектер мен құрамдас бөліктер өндірісін жергіліктендіру, өндірістік кооперацияны дамыту, лазерлік және нүктелік дәнекерлеу, механикалық өңдеу мен бояу технологиялары бар. Автомобиль саласында жасанды интеллект пен цифрлық технологияларды қолдану да жеке бағыт ретінде қарастырылды.
Тәжірибелік тетіктердің бірі ретінде Allur компаниясының ғылыми-техникалық және өндірістік міндеттер қорын қалыптастыру көзделген. Соның негізінде тараптар кәсіпорында қолдануға бағытталған зерттеулердің, оқу жобалары мен инженерлік әзірлемелердің тақырыптарын анықтай алады. Бұл студенттерді оқу барысында нақты міндеттерді шешуге тартып, ғылыми жұмысты өндіріс қажеттіліктерімен байланыстыруға мүмкіндік береді.
ШҚТУ Satbayev University-мен бірлесіп инженерлік білім берудің ұлттық моделін әзірлеуге қатысып жатыр. Өндірістік кафедра осы модельді өңірлік деңгейде тәжірибеге енгізудің бір тетігіне айналуы мүмкін. Ол үшін өңірдегі қажеттіліктер мен құзыреттер картасы нақты білім беру бағдарламаларына, зерттеу міндеттері мен өнеркәсіптік жобаларға айналдырылады. Мұндай тәсіл қазіргі кадр сұранысын ғана емес, өндіріс одан әрі дамыған кезде қажет болатын құзыреттерді де ескеруге мүмкіндік береді.
Ынтымақтастықтың келесі кезеңінде ШҚТУ делегациясының Саран мен Қостанайдағы Allur өндірістік алаңдарына сапары жоспарланған. Технологиялық үдерістермен танысу бірлескен жобалардың міндеттері мен инженерлерді даярлау мазмұнын нақтылауға мүмкіндік береді.
ШҚТУ базасында өндірістік кафедра ашу Allur экожүйесі үшін инженерлік әлеуетті дамытудың заңды жалғасы саналады. Дуальды білім беру тәжірибесі, ғылыми ынтымақтастық және өңірлік университеттің мүмкіндіктері ортақ мақсатқа жұмылдырылады. Негізгі міндет өндірісті дамыту мен жергіліктендіру деңгейін арттыруға қажетті мамандар даярлап, қолданбалы шешімдер әзірлеу болмақ.
