Eńbekshiqazaq aýdany Bólek aýylynyń 11 synyp oqýshysy Ali Loian Ulttyq biryńǵai testileýden 140 balldy tolyq jinap, jurt nazaryn ózine aýdardy. Basty bilim báigesinen súrinbei ótken talapker, barlyq suraqqa múdirmesten durys jaýap bergen, dep habarlaidy dalanews.kz "Qonaevtv"-ǵa silteme jasap.
Eńbekshiqazaq aýdanyndaǵy Maksim Gorkii atyndaǵy orta mekteptiń maqtanyshy 17 jasta. Talapker ulttyq biryńǵai testileýde Qazaqstan tarihy men dúniejúzi tarihy pánin tańdap, shekti baldy tolyq jinady. Al Álidiń qalǵan bally IELTS jáne SAT halyqaralyq emtihandarynyń nátijesinde eseptelgen.
«Daiyndyǵymdy 10 synyptyń sońynda bastadym. Aǵylshyn oqydym, halyqaralyq ekzamen tapsyrdym, sodan keiin 11 synyptan bastap júieli daiyndyǵymdy bastap kettim. Dostarym fýtbol oinap, serýendeýge shaqyrǵanda joq meniń daiyndalyp, maqsatyma jetip kóp ball alýym kerek dep jaýap beretinmin. Sebebi bir nársege jetý úshin birnársemen qosh aitysýyn kereksiń dep aitýǵa bolady», - deidi Ali Loian.
Óz múmkindiginiń kóptigine qaramastan jas túlek oblysta qalyp, SDU ýniversitetiniń shet tilderi fakýltetine oqýǵa túsýdi qalap otyr. Basty maqsaty aǵylshyn jáne qytai tilderin erkin meńgerip, el damýyna óz úlesin qospaq.
«Qazaqstan boiynsha 6 bolyp 140 ball aldym. Ózimniń oblysymnyń, aýylymnyń atyn shyǵarǵanyma qýanyshtymyn. Nege til mamandyǵyn tańdap otyr deseńiz osy tilderdi úirenip, basqa elderden kelgen adamdarǵa osy oblysymyzdyń ádemi jerlerin tanystyryp, týrizmdi damytsam bolady», - deidi jas túlek.
Túlektiń anasy UBT-ǵa daiyndyq kezinde balasynyń áleýmettik jeliden bas tartyp, tolyqtai oqýǵa zeiin qoiǵanyn aitady, Aqtileýli ana perzentiniń maidai teri ótelgenine qýanyshty.
"Estigen kezde alǵashynda senbedim, qaita suradym: «Shynymen 140 pa?» dedim. Ol «Iá» dedi. Árine, qatty qýandym, sebebi onyń eńbegi aqtaldy, sonsha daiyndaldy. Bul — bizdiń otbasymyz úshin de, ózi úshin de úlken jetistik", - deidi Álidiń anasy Anar Jaqsybaeva.
Tynbai izdenip, tyńǵylyqty daiyndalǵan bilimger órenge baǵyndyrǵan belesi úshin 1 million teńge qarjylai syi tabystaldy. Túlekke júktelgen endigi mindet aldaǵy emtihandardy sátti tapsyryp, «Altyn belgi» ataǵyn abyroimen qorǵap shyǵý.
