Uly Jeńistiń 81 jyldyǵyna orai Almaty oblysynyń ortalyǵyndaǵy «Ardagerler saiabaǵynda» ornalasqan Dańq memorialy janynda jarqyn bolashaq úshin janyn pida etken bozdaqtardy eske alýǵa arnalǵan jiyn ótti. Maqsaty – Ekinshi dúniejúzilik soǵys ardagerleriniń erligin ulyqtaý, tyl eńbekkerlerine qurmet kórsetý, jas urpaqtyń boiynda otansúigishtik pen tarihi jadyny qalyptastyrý, dep habarlaidy dalanews.kz.
Jinalǵandar maidan dalasynda sheiit bolyp, jat jerdiń topyraǵy buiyrǵan bozdaqtardy bir minýt únsizdikpen eske aldy. Odan keiin oblys ákimi Marat Sultanǵaziev sóz sóilep, soǵysqa qatysyp, búginde aramyzda qalǵan sanaýly qart jaýyngerlerge qurmet kórsetý barshanyń qasietti boryshy ekenin aitty.
– Soǵys jyldary elimizden 1 million 366 myń jaýynger maidanǵa attandy. Onyń 120 myńnan astamy Almaty óńirinen boldy. Maidan shebinen myńdaǵan bozdaq qaityp oralmady. Almaty óńirinen attanyp, soǵysta eren erligimen tanylǵan 40 jaýyngerge Keńes odaǵynyń Batyry ataǵy berildi. Bul – halqymyzdyń Otan úshin janyn aiamai, erlik pen batyrlyqtyń óshpes úlgisin kórsetkeniniń aiqyn dáleli.
Almaty oblysy ákimdigi tarapynan jyl saiyn áleýmettik, materialdyq jáne moraldyq qoldaý sharalary júzege asyrylýda. Biyl da qalyptasqan dástúr boiynsha Almaty oblysynan soǵysqa qatysqan 4 ardagerge 5 million teńgeden birjolǵy áleýmettik kómek berildi. Jeńiske jetý jolynda tyl eńbekkerleriniń de qosqan úlesi zor boldy. Soǵys jyldary aýyr eńbek pen zor jaýapkershilikti moiyndaryna alyp, maidandy azyq-túlikpen, kiim-keshekpen jáne qajetti qural-jabdyqtarmen qamtamasyz etý úshin kún-tún demei eńbek etti.
Olardyń qajyrly eńbegi Jeńisti jaqyndatqan mańyzdy kúshterdiń birine ainaldy. Búginde oblysymyzda 2 038 tyl ardageri bar. Árqaisynyń ómir joly – keiingi urpaqqa ónege, al janqiiarlyq eńbegi el jadynda máńgi saqtalady, – dedi oblys ákimi.
Odan keiin óńir basshysy, oblystyq máslihat tóraǵasy, ardagerler uiymynyń tóraǵasy, Qonaev qalasynyń ákimi, quqyq qorǵaý organdary, áskeri bólim, departamentter men basqarma basshylary, máslihat depýtattary, tyl jáne eńbek ardagerleri, Aýǵan soǵysynyń qatysýshylary, oblys pen qalanyń Qurmetti azamattary, mekeme-kásiporyn basshylary, etnomádeni birlestikterdiń músheleri jáne jastar «Máńgilik alaýǵa» gúl sebetterin qoiyp, bozdaqtar rýhyna taǵzym jasady.
Jeńis kúni qarsańynda Marat Eleýsizuly oblys aýmaǵynda turatyn kózi tiri soǵys ardagerleriniń shańyraǵyna arnaiy baryp, Memleket basshysy Qasym-Jomart Toqaevtyń quttyqtaýyn jetkizdi.
Qonaev qalasyndaǵy merekelik shara odan ári Berdibek Soqpaqbaev atyndaǵy ortalyq saiabaqta óz jalǵasyn tapty.
Mundaǵy kontserttik baǵdarlamada áskeri-patriottyq ánder shyrqalyp, mádeniet jáne óner ujymdarynyń qoiylymdary kórermender nazaryna usynyldy. Sonymen qatar jastardyń patriottyq aktsiialary uiymdastyrylyp, qala ákimi tyl eńbekkerleriniń úiine baryp, merekemen quttyqtap shyqty.
