Almaty oblysynda jedel meditsinalyq járdem qyzmetiniń avtoparki aýqymdy jańartýdan ótýde. Meditsina qyzmetkerleri kúni qarsańynda óńirdiń jedel meditsinalyq járdem stantsiiasyna 70 jańa sanitariialyq avtokóliktiń kilti tabystalady. Qazirgi ýaqytta avtokólikterdiń qujattaryn rásimdeý jumystary júrgizilýde, dep habarlaidy dalanews.kz.
Jańa tehnikalar 2025 jyly lizing sharty negizinde satyp alynǵan. Onyń ishinde 30-y «S» klasyndaǵy reanimobil, al 40-y «V» klasyndaǵy sanitariialyq avtokólik. Barlyǵy zamanaýi meditsinalyq jabdyqtarmen tolyq qamtamasyz etilgen jáne shuǵyl kómek kórsetýge beiimdelgen.
Osylaisha, biyl Almaty oblysynyń jedel meditsinalyq járdem qyzmeti úshin satyp alynǵan 90 sanitariialyq avtokóliktiń barlyǵy paidalanýǵa beriledi. Onyń 20-sy jyl basynda meditsinalyq uiymdarǵa tapsyrylsa, qalǵan 70 kólik jaqyn kúnderi qyzmetke kirisedi.
Almaty oblysy Densaýlyq saqtaý basqarmasynyń basshysy Erjan Súleimenovtiń aitýynsha, avtoparkti jańartý turǵyndarǵa kórsetiletin jedel meditsinalyq kómektiń sapasy men qoljetimdiligin arttyrýǵa múmkindik beredi.
«Jedel meditsinalyq járdem qyzmetiniń materialdyq-tehnikalyq bazasyn jańartý jumystary kezeń-kezeńimen jalǵasýda. Jańa sanitariialyq avtokólikter shalǵai eldi mekenderge der kezinde jetýge, shaqyrtýlarǵa jedel áreket etýge jáne meditsinalyq kómektiń sapasyn jaqsartýǵa múmkindik beredi. Bul — turǵyndardyń qaýipsizdigi úshin jasalyp jatqan mańyzdy jumys», — dedi Erjan Súleimenov.
Jedel járdem qyzmetiniń avtoparkin jańartýǵa biznes ókilderi de qoldaý kórsetip keledi. Ótken jyly áleýmettik jaýapkershilik aiasynda «Mareven Food» JShS jedel meditsinalyq járdem qyzmetine gýmanitarlyq kómek retinde «V» klasyndaǵy 10 Foton markaly sanitariialyq avtokólikti tabystaǵan bolatyn.
Qazirgi tańda Almaty oblysynda jedel meditsinalyq kómekti 1 stantsiia, 12 qosalqy stantsiia, aýyldyq eldi mekenderdegi 66 dislokatsiialyq pýnkt jáne 1 sanitariialyq aviatsiia bólimshesi kórsetedi. Óńirde 147 jedel meditsinalyq járdem brigadasy jumys isteidi. Onyń ishinde 20 dárigerlik jáne 127 feldsherlik brigada bar.
