Jańa oqý jyly qarsańynda Almaty oblysynda «Keleshek mektepteri» jobasy aiasynda 4 200 orynǵa shaqtalǵan bes jańa bilim oshaǵy ashylady. Sonymen qatar renovatsiia baǵdarlamasy aiasynda taǵy 10 mektep kúrdeli jóndeýden ótkizilip, paidalanýǵa berilmek. Bul týraly Almaty oblysynyń ákimi Marat Sultanǵaziev «Konstitýtsiialyq qundylyqtar: kásibilik, sapa, nátije» atty oblystyq tamyz máslihatynda málimdedi, dep habarlaidy dalanews.kz.
Sonymen qatar oblysta mektep tapshylyǵyn joiý maqsatynda jańa jobalar da ázirlenýde. Máselen, Almaty ákimdigimen birlesip, birneshe jańa mektep salý josparlanýda. Oblys ákimdigi jer ýchaskelerin anyqtap qoiǵan, qazirgi tańda taraptar kelissózder júrgizýde.
«Almaty aglomeratsiiasyn damytý aiasynda qala mańyndaǵy aýmaqtarda jańa bilim berý nysandaryn salý jóninde kelisimderge qol jetkizildi. Bizdiń tarapymyzdan jer ýchaskelerin usynamyz. Búginde olar anyqtaldy, barlyq qajetti aqparat Almatynyń jobalyq keńsesine joldandy. Boljam boiynsha quny 41,8 mlrd teńgeni quraityn bes jańa mektep salý múmkindigi qarastyrylýda. Bul jobalar júzege assa, balalardy turǵylyqty jeri boiynsha mektep oryndarymen qamtamasyz etýge jáne Almatyǵa kúndelikti qatynaýdy azaitýǵa múmkindik beredi. Búginde oblysta turatyn 16 myńǵa jýyq oqýshy qala mektepterinde bilim alýda», - dedi Almaty oblysynyń ákimi Marat Sultanǵaziev.
Josparǵa sáikes, árqaisysy 900 oryndyq eki mektep Alataý qalasynyń Jańa Dáýir shaǵyn aýdanynda jáne Ile aýdanyndaǵy Ekpindi aýylynda salynbaqshy. Qarasai aýdanyndaǵy Kóksai jáne Qyrǵaýyldy aýyldarynda árqaisysy 1 200 orynǵa arnalǵan taǵy eki mektep boi kóteredi. Talǵar aýdanynyń Tuzdybastaý aýylynda 900 oryndyq bilim oshaǵyn salý josparlanǵan. Osylaisha, bes mekteptiń jalpy jobalyq qýaty 5 100 oqýshy ornyn quraidy.
Sonymen qatar qyrkúiek aiynda oblysta «Keleshek mektepteri» jobasy aiasynda salynǵan taǵy bes jańa mektep oqýshylar úshin esigin aiqara ashady. Olar Alataý qalasynyń Qoianqus aýylynda, Ile aýdanynyń Tilendiev aýylynda, Qarasai aýdanynyń Bulaqty aýylynda, sondai-aq Eńbekshiqazaq aýdanynyń Satai jáne Ashysai aýyldarynda ornalasqan. Osylaisha atalǵan eldi-mekenderdegi úsh aýysymdy mektep máselesi tolyq sheshilip, taǵy eki mekteptegi oqýshy oryndarynyń tapshylyǵy joiylady dep kútilýde.
Óńirdegi joǵary demografiialyq ósim jaǵdaiynda jańa nysandardyń qurylysy bilim berý júiesindegi infraqurylym tapshylyǵyn azaitý úshin asa mańyzdy.
2026 - 2027 oqý jylynda Almaty oblysynyń 502 jalpy bilim beretin mektebinde shamamen 385 myń bala bilim alady. Onyń 35 myńnan astamy biyl alǵash ret mektep tabaldyryǵyn attaityn birinshi synyp oqýshylary.
«Almaty oblysy - demografiialyq ósimi joǵary jáne jastardyń úlesi basym óńirlerdiń biri. Osyǵan bailanysty infraqurylym tapshylyǵyn joiý máselesi basty nazarda. Sońǵy tórt jylda oblysta 75 jańa mektep ashylyp, alty qosymsha ǵimarat paidalanýǵa berildi. Nátijesinde úsh aýysymdy mektepterdiń sany 52-den 23-ke deiin qysqardy, shalǵai eldi mekenderden 5 821 oqýshyny tasymaldaý máselesi sheshildi», - dedi oblys ákimi.
Jańa mektepter salýmen qatar, qoldanystaǵy bilim berý nysandarynyń infraqurylymy da jańartylýda. Óńirde kúrdeli jóndeýdi qajet etetin 91 bilim berý nysany anyqtalǵan. Biyl oblystaǵy 11 mektepte kúrdeli jóndeý jumystary júrgizilýde. Onyń 10-y jańa oqý jylynda paidalanýǵa beriledi.
Sondai-aq halyq tyǵyz ornalasqan aýyldarda mektep salý máselesi de basty nazarda. 2026–2030 jyldary EPC+F mehanizmi arqyly Ile aýdanyndaǵy Ótegen batyr, Jainaq, Baiserke jáne A. Toqpanov aýyldarynda, sondai-aq Eńbekshiqazaq aýdanyndaǵy Báiterek aýylynda jalpy syiymdylyǵy 4 200 oryn bolatyn bes mektep salý josparlanýda.
Bul jobalar iske asyrylsa úsh aýysymda oqyp júrgen jeti myńnan astam oqýshynyń máselesi tolyq sheshilip, shalǵai eldi mekenderden tasymaldanatyn taǵy 2 871 bala óz aýylynda bilim alatyn bolady.
