Almatynyń Medeý aýdanynda zańsyz ornatylǵan statsionarlyq emes saýda nysandaryn (SESN) súrý jumystary aiaqtaldy. Bul shara Almaty qalasynyń ákimi Erbolat Dosaevtyń tapsyrmasymen ákimdik bastamasymen júrgizilgen zańsyz dúńgirshekterdi joiý naýqany aiasynda júzege asyryldy,- dep habarlaidy Dalanews.kz
2025 jyly 20-27 qańtar aralyǵynda 13 zańsyz nysannyń ielerine olardy óz erkimen buzý týraly eskertý berildi. Sonyń nátijesinde kelesi mekenjailardaǵy 9 dúńgirshek súrildi: Táttimbet kóshesi, 9/1; Qajymuqan kóshesi, 10a jáne 32; Jibek joly dańǵyly, 64; Qaldaiaqov kóshesi, 17; Pýshkin kóshesi, 26; Dýman-2 shaǵynaýdany, 25 jáne Medeý aýmaǵy. Sonymen qatar, ákimdik apparatynyń qyzmetkerleri Jibek joly dańǵyly, 47; Raiymbek batyr dańǵyly, 100/1; Táttimbet kóshesi, 9/1 jáne Shashkin kóshesi, 21 mekenjailarynda 4 SESN-di buzdy. Aýdandaǵy josparlanǵan barlyq buzý jumystary aiaqtalyp, zańsyz dúńgirshekter alynyp tastaldy.
Sonymen qatar, Jangeldin kóshesi, 22/1; Chaikina kóshesi, 3; Joldasbekov kóshesi, 9/1; Samal-2 shaǵynaýdany, 2A; Táttimbet kóshesi, 9/1; Pýshkin kóshesi, 1/2 jáne 28 gvardiiashy-panfilovshylar saiabaǵynda ornalasqan 6 nysan kúrdeli qurylys bolyp sanalady. Olardyń tizimi Jer resýrstaryn basqarý departamenti men Qala qurylysyn baqylaý basqarmasyna ári qarai shara qabyldaý úshin jiberildi.
Eske salsaq, 2025 jylǵy 4 aqpannan bastap Kásipkerlik jáne investitsiialar basqarmasy Jumys tobymen birge Almaty qalasynda kóshe saýdasyn joiý jumystaryna kiristi. Búgingi tańda memlekettik qor jerlerinde ornalasqan 300-den astam SESN men 222 oiyn avtomaty buzyldy. Sonymen qatar, jer telimderine berik bekitilgen 32 kúrdeli qurylys anyqtalyp, olardy májbúrli túrde buzý úshin sotqa talap-aryz joldandy.
«Bul jumys qala úshin óte mańyzdy, óitkeni dúńgirshekter kóshelerimizdi toltyryp, keide júrginshiler jolyn jaýyp, tazalyq máselesin týdyrady. Barlyǵy zań aiasynda jumys istep, sanitarlyq normalardy saqtaýy kerek dep sanaimyn. Bul – bizdiń densaýlyǵymyz ben balalarymyzdyń bolashaǵy úshin qajet. Eger qazir tártip ornatpasaq, erteń jaǵdai ýshyǵady. Almaty taza kósheleri men joǵary mádenieti bar kórikti qala bolyp qalýǵa tiis», – dedi qala turǵyny Saýle Omarova.
Zańsyz ornatylǵan injenerlik jelilerdi ajyratý jumystary jalǵasýda, al qalǵan 210 SESN-di buzý 2025 jyly 15 naýryzǵa deiin tolyq aiaqtalady.
