الماتىنىڭ مەدەۋ اۋدانىندا زاڭسىز ورناتىلعان ستاسيونارلىق ەمەس ساۋدا نىساندارىن (سەسن) ءسۇرۋ جۇمىستارى اياقتالدى. بۇل شارا الماتى قالاسىنىڭ اكىمى ەربولات دوسايەۆتىڭ تاپسىرماسىمەن اكىمدىك باستاماسىمەن جۇرگىزىلگەن زاڭسىز دۇڭگىرشەكتەردى جويۋ ناۋقانى اياسىندا جۇزەگە اسىرىلدى،- دەپ حابارلايدى Dalanews.kz
2025 جىلى 20-27 قاڭتار ارالىعىندا 13 زاڭسىز نىساننىڭ يەلەرىنە ولاردى ءوز ەركىمەن بۇزۋ تۋرالى ەسكەرتۋ بەرىلدى. سونىڭ ناتيجەسىندە كەلەسى مەكەنجايلارداعى 9 دۇڭگىرشەك ءسۇرىلدى: تاتتىمبەت كوشەسى، 9/1؛ قاجىمۇقان كوشەسى، 10ا جانە 32؛ جىبەك جولى داڭعىلى، 64؛ قالداياقوۆ كوشەسى، 17؛ پۋشكين كوشەسى، 26؛ دۋمان-2 شاعىناۋدانى، 25 جانە مەدەۋ اۋماعى. سونىمەن قاتار، اكىمدىك اپپاراتىنىڭ قىزمەتكەرلەرى جىبەك جولى داڭعىلى، 47؛ رايىمبەك باتىر داڭعىلى، 100/1؛ تاتتىمبەت كوشەسى، 9/1 جانە شاشكين كوشەسى، 21 مەكەنجايلارىندا 4 سەسن-دى بۇزدى. اۋدانداعى جوسپارلانعان بارلىق بۇزۋ جۇمىستارى اياقتالىپ، زاڭسىز دۇڭگىرشەكتەر الىنىپ تاستالدى.
سونىمەن قاتار، جانگەلدين كوشەسى، 22/1؛ چايكينا كوشەسى، 3؛ جولداسبەكوۆ كوشەسى، 9/1؛ سامال-2 شاعىناۋدانى، 2ا؛ تاتتىمبەت كوشەسى، 9/1؛ پۋشكين كوشەسى، 1/2 جانە 28 گۆاردياشى-پانفيلوۆشىلار ساياباعىندا ورنالاسقان 6 نىسان كۇردەلى قۇرىلىس بولىپ سانالادى. ولاردىڭ ءتىزىمى جەر رەسۋرستارىن باسقارۋ دەپارتامەنتى مەن قالا قۇرىلىسىن باقىلاۋ باسقارماسىنا ءارى قاراي شارا قابىلداۋ ءۇشىن جىبەرىلدى.
ەسكە سالساق، 2025 جىلعى 4 اقپاننان باستاپ كاسىپكەرلىك جانە ينۆەستيسيالار باسقارماسى جۇمىس توبىمەن بىرگە الماتى قالاسىندا كوشە ساۋداسىن جويۋ جۇمىستارىنا كىرىستى. بۇگىنگى تاڭدا مەملەكەتتىك قور جەرلەرىندە ورنالاسقان 300-دەن استام سەسن مەن 222 ويىن اۆتوماتى بۇزىلدى. سونىمەن قاتار، جەر تەلىمدەرىنە بەرىك بەكىتىلگەن 32 كۇردەلى قۇرىلىس انىقتالىپ، ولاردى ءماجبۇرلى تۇردە بۇزۋ ءۇشىن سوتقا تالاپ-ارىز جولداندى.
«بۇل جۇمىس قالا ءۇشىن وتە ماڭىزدى، ويتكەنى دۇڭگىرشەكتەر كوشەلەرىمىزدى تولتىرىپ، كەيدە جۇرگىنشىلەر جولىن جاۋىپ، تازالىق ماسەلەسىن تۋدىرادى. بارلىعى زاڭ اياسىندا جۇمىس ىستەپ، سانيتارلىق نورمالاردى ساقتاۋى كەرەك دەپ سانايمىن. بۇل – ءبىزدىڭ دەنساۋلىعىمىز بەن بالالارىمىزدىڭ بولاشاعى ءۇشىن قاجەت. ەگەر ءقازىر ءتارتىپ ورناتپاساق، ەرتەڭ جاعداي ۋشىعادى. الماتى تازا كوشەلەرى مەن جوعارى مادەنيەتى بار كورىكتى قالا بولىپ قالۋعا ءتيىس»، – دەدى قالا تۇرعىنى ساۋلە وماروۆا.
زاڭسىز ورناتىلعان ينجەنەرلىك جەلىلەردى اجىراتۋ جۇمىستارى جالعاسۋدا، ال قالعان 210 سەسن-دى بۇزۋ 2025 جىلى 15 ناۋرىزعا دەيىن تولىق اياقتالادى.
