Búginde Almaty qalasynda abattandyrý, kógaldandyrý jumystary qarqyndy júrip jatyr. Jasyl jelek qalanyń tynysyn ashyp, ekologıalyq ahýalynyń jaqsarýyna aıtarlyqtaı septesýde. Bul baǵytta ákimdik tarapynan atqarylyp jatqan jumystardy almatylyqtar joǵary baǵalaýda. Bul jaıynda BMSK jáne ońtaılandyrý medısınasy mamandary asosıasıasynyń tóraǵasy, profesor Erjan Óteýlıev «Almaty qalasyndaǵy kógaldandyrý jumystary halyqtyń densaýylǵynyń jaqsartý baǵytyndaǵy mańyzdy jumys» dep baǵasyn berdi.

– Qazirgi júrgizilip jatqan kógaldandyrý jumystary eń aldymen qoǵam densaýlyǵyn qalyptastyrýdaǵy ıgi isterdiń biri dep bilemin. Dúnıejúzilik densaýlyq saqtaý uıymynyń baǵdarlamasynda «Deni saý qalalar» degen túsinik bar. Iaǵnı, onda halyqtyń densaýlyǵyn kúsheıtýge baǵyttalǵan úlken sharalar qamtylady. Ol baǵdarlamanyń ózindik talap, qaǵıdalary bar.

Saý qala bolýǵa bet burǵan elderdiń barlyǵy eń birinshi osy kógaldandyrý jumystaryna kóńil bóledi. Sonymen qatar ýly qaldyqtar bóletin avtokólikterdi azaıtyp, gazben júretin kólikterge almastyrýdy kózdeıdi.

Óıtkeni, onyń bári qalanyń ekologıasyna, adamnyń densaýlyǵyna asa qaýipti ekeni belgili. Sáıkesinshe, densaýlyqty nyǵaıtýǵa, halyqtyń belsendiligin arttyrýǵa jaǵdaı jasaý qaǵıda retinde qalyptasqan. Dúnıejúzilik densaýlyq saqtaý uıymynyń negizgi baǵyty da – osy.

Dál osy maqsatta densaýlyq saqtaý mamandary jylyna bir ret bas qosyp, qala ákimderimen birlesip jospar qura otyryp, jumys jasaıdy. Sebebi, kógaldandyrý jumystary – tek qalany, qorshaǵan ortany kórkeıtý ǵana emes, bul jalpy halyqtyń densaýlyǵyn qalyptastyrýǵa baǵyttalǵan eń negizgi isterdiń biri, – dep bilikti maman oıyn ortaǵa saldy.