Almaty qalasynda kelesi jyly mektepterdi seismikalyq kúsheitý arqyly jańartý jáne jańǵyrtý jumystary jalǵasady. 2025-2027 jyldarǵa arnalǵan tiisti biýdjet jobasy aldaǵy Máslihat sessiiasynda qaralady. Bul týraly qalalyq Máslihattyń baspasóz qyzmeti habarlady.
Úsh jyldyq biýdjet jobasyna sáikes, 216 mektepti, 12 internat mekemesin, 20 kolledjdi qamtityn 344 myń oqýshynyń bilim alýyna jaǵdai jasaý úshin shamamen 250 mlrd teńge bóliný josparlanyp otyr.
Mektepterdi seismikalyq kúsheitý arqyly jańǵyrtý men jańartý – qalalyq ákimdiktiń basty basymdyǵynyń biri. Jańa úsh jyldyq biýdjet qabyldanǵannan keiin megapoliste oqý oryndaryn joǵary sapa standarttaryna sai jańǵyrtý jumystary jalǵasady.
Memleket basshysynyń seismikalyq qaýipsizdikti qamtamasyz etý jónindegi tapsyrmalaryn oryndaý aiasynda 2025 jyly úsh mekteptiń seismikalyq kúsheitý jumystary aiaqtalyp, №50 mektep-litseii men Áýezov, Bostandyq jáne Medeý aýdandaryndaǵy jeti balabaqshada kúsheitý jumystary bastalady. Buǵan qosa, kelesi jyly Zerdeli jáne Shuǵyla shaǵyn aýdandarynda eki mekteptiń qurylysy aiaqtalyp, 12 mektep jańartýdan ótedi. Almatyda 2023-2024 jyldary 11 mekteptiń kúrdeli jóndeýi seismikalyq kúsheitý arqyly aiaqtaldy.
Sondai-aq, kelesi jyly megapoliste ulttyq «Jaily mektep» jobasy aiasynda 24,2 myń oqýshy ornyn qamtamasyz etetin 14 mektep paidalanýǵa beriledi. Jańa oqý jylyna qarai oqýshy oryndarynyń tapshylyǵy «tiisti» deńgeige – 3-4 myń orynǵa deiin azaiady.
Qabyldanǵan sharalardyń arqasynda Almatyda mektepter birtindep bir aýysymdy oqý júiesine kóshýde. Kelesi oqý jylyna qarai 200-den astam memlekettik mekteptiń 43-i bir aýysymdy oqý formatyna kóshedi (kórsetkish 12,5%-dan 18,4%-ǵa deiin ósedi).
Qalalyq mektepterdiń infraqurylymyn jańǵyrtý men damytýǵa úlken kóńil bólinýde. Biyl 89 mektepke jańa úlgidegi 168 kabinet satyp alyndy. Bul mektepterdiń qazirgi zamanǵy pándik kabinettermen jabdyqtalý deńgeiin 86,3%-ǵa jetkizdi.
2025 jyly Orbita-3, Altyn-Besik, Quramys, Shuǵyla jáne №10 shaǵyn aýdandarynda 5 balabaqshanyń qurylysyn jalǵastyrý men jańartýǵa qarjy bólý josparlanyp otyr. Bul Memleket basshysynyń 2025 jylǵa deiin 3 pen 6 jas aralyǵyndaǵy balalardy 97% mektepke deiingi bilimmen qamtý jónindegi tapsyrmasyn júzege asyrý aiasynda qolǵa alynady.
Sonymen birge, kelesi jyly Qaraǵaily, Darhan jáne Nurkent shaǵyn aýdandarynda 3 balabaqsha salý josparlanýda. Osy qurylys jumystary aiaqtalǵannan keiin 2 280 bala balabaqshaǵa barýǵa múmkindik alady, bul shaharda bilim berý men erte damýdyń sapasyn aitarlyqtai arttyrady.
