"Buǵan deiin Jusan bank alǵan zaem tóńiregindegi sybystyń túp-tórkini aqyry aiqyndaldy. Endi bul bank Alatau City Bank (ACB) bolyp qaita qurylady". Osylai degen qarjyger-maman Rasýl Rysmambetovtyń pikirinshe, bul – Jetigen-Alataý qalasyna arnalǵan jeke banktiń bolýy Almaty mańynda jańasha bir qarjy ortalyǵy qalyptasyp jatqanyn meńzei alady. Sarapshy, bárinen buryn munda Otbasy bank pen "Báiterektiń" de aqshasy tartylýy múmkin ekenin aitady, dep habarlaidy Dalanews.kz.
"Bul arada kórshi eldiń astanasy Tashkent qalasyn damytý úshin qurylǵan "Poitaht" bank qateligine jol bermegen mańyzdy. Ózbekstanda memlekettik biýdjetke senim artyp, banktiń qarjylyq turaqtylyǵyn tiisti dárejede qamtamasyz etý jaiyna nazardan tys qaldyrý úlken qatelik bolǵany belgili. Nátijesinde, ortalyq banktiń qatań kredittik talaptary banktiń milliardtaǵan dollar qarjyny tartýyna kedergi jasaǵan bolatyn", - deidi ol.
Sarapshynyń oiynsha, Qazaqstan biligi men jańa qalanyń sáýletshileri de bul jaiynan habardar ári ony basty nazarǵa alyp otyrǵan bolýy kerek (investorlardan jer telimderin alyp qoiý jaǵdaiyn).
"Jańa qalany aiqyn maqsat pen mindetsiz salýǵa bolmaidy. Sondyqtan bul rette basty jospar jáne iske asyrylatyn ideia jobalary ázir dep oilaimyn. Jaqynda ótken Astana ekonomikalyq forýmynda (AEF) jańa qala tujyrymdamasy tanystyryldy, ázirge naqty jospary emes, tek maketi ǵana usynyldy. Jetisý óńiriniń turǵyndary men Almaty qalasy úshin irgeden jańa qalanyń boi kóterýi – qýanyshty jańalyq. Endi oblystyń bas qosatyn taǵy bir ortalyǵy bolady", - deidi Rysmambetov.
Eger Nazarbaevtyń kezinde óte qymbatqa túsken úlken qala - el astanasy salynsa, al Toqaevtyń usynǵan "Alataýy" jinaqy jáne biznes qaýymdastyqqa arnalǵan qaýipsiz qala retinde tanystyrylýda.
"Bir sózben aitqanda, Almaty oblysynda biznes-qaýymdastyqtyń talap-talǵamyna sai, elitaly ári yqsham shahar paida bolmaq. Qazaqstannyń qala salý tájiribesine súiensek, jańa qalany turǵyzý – eski qalany jóndep, jańalaǵannan áldeqaida tiimdi ári ońai bolmaq. Bul rette Qapshaǵai qalasy kúrdeli rekonstrýktsiia men investitsiialarǵa muqtaj ekeni shyndyq. Jańa qala turǵyzyla bastaǵan kezde bul máseleler nazardan tys qalmaýy tiis. Eger biliktiń ornynda bolsam, men "Alataý" qalasyn tolyǵymen jekemenshik basqarýǵa berip, tipti ákimin halyqtyń ózderi sailaityn, zamanaýi úlgidegi qalashyq retinde damytýǵa múmkindik berer edim. Qazaqstanda buǵan deiin de munai men metallýrgiia kompaniialarynyń basqarýyndaǵy monoqalalar tájiribesi bar, biraq zamanaýi biznes-qalanyń modeli retinde bul Qazaqstan úshin tyń bastama bolmaq", - deidi maman.
Sarapshy jańa qalanyń qurylysy úkimettiń basty nazarynda bolatyny anyq ekenin aitady.
"Osy jaǵynan alǵanda, aldaǵy ýaqytta Almaty oblysynyń ákiminiń aýysýy múmkin nemese "Alataý" jobasyn tikelei prezidenttiń nemese premer-ministrdiń qadaǵalaýyna ótkizý máselesi qarastyrylýy yqtimal", - deidi ol.
Taǵy bir mańyzdy faktor – Qapshaǵai aimaǵynda qys mezgilinde aýa raiy ylǵaldy ári sýyq.
"Osyǵan bailanysty jańa qalada táýelsiz ortalyqtandyrylmaǵan jylytý júielerin ornatý nemese jańartylatyn energiia kózderin paidalaný tiimdi bolmaq. Aqmola oblysyndaǵy Aqkól qalasynyń tájiribesin eskere otyryp, osy baǵyttaǵy qatelikterdi qaitalamaǵan abzal", - deidi Rasýl Rysmambetov.
Buǵan deiin Qarjy naryǵyn retteý jáne damytý agenttigi resmi túrde Viacheslav Kimge "First Heartland Jusan Bank" AQ-tyń iri qatysýshysy mártebesin ielenýge kelisim bergenin jazǵanbyz. 2025 jyly 28 mamyrda Jusan Bank ataýyn ózgertetinin resmi túrde jariialady. Bank baspasóz qyzmeti endigiden bastap ózderiniń "Alatau City Bank"AQ dep atalatynyn naqtylady. Kimnen bólek taǵy birqatar oligarhtar Astana ekonomikalyq forýmynda Alataý qalasyna investitsiia jasaýǵa ázir ekendikterin málimdedi.
