Bıznesti qoldaý Jańa Qazaqstandaǵy basym baǵyttardyń biri. Bul rette «Damý» qory aımaqtyq kásip­oryndardyń qyz­metin jandandyrýǵa mańyz berip kele­di.

Óz kezeginde almatylyq kásipkerler bıyl jyldyń 10 aıynda qor tarapynan jalpy kólemi 63 mlrd teńge kóleminde kómek alǵan.

Óz kásibin órge dóńgeletkisi keletinder úshin qarjylyq tapshylyq basty kedergi. «Damý» qory jeńildikpen nesıeleý, syıaqy mólsherlemesin sýbsıdıalaý, kredıtterge kepildik berý sekildi úsh baǵytta qol­daý kórsetedi. Qor tarapynan qoldaý tapqan­dardyń biri – kásipker Meıirbek Esimbekov.

2016 jyly qordyń kómegimen óndiris ornyn ashqan ol qanshama azamatty jumyspen qamtyp otyr.

«Bıznesti qoldaý el ekonomıka­syn damy­tý­dyń tóte joly. Muny Prezı­dentimiz de ár Joldaýynda aıtyp keledi. «Damý» qory dál kerek ýaqytynda bizge qajetti qarajatty bóldi. Bul kásibi­mizdi damytýǵa úlken kómek boldy. Sonymen qatar bizdiń eń kerekti qural-jabdyqtarymyzdy túgendep berip jatyr. Alǵashqy ýaqytta 200 mln, bıyl lazerlik qondyrǵy úshin 30 mln teńge aldyq», dedi M.Esimbekov.

Qarjylaı kómek alyp qarqyndy jumys istep jatqandardyń qatarynda dańqty ziltemirshi Maııa Maneza da bar.  

Inemen emdeý, hıjama, massaj ortalyǵyn ashqan sportshynyń qol astynda 5 jyldan beri 10 azamat jumys isteıdi.



«Damý» qory jyl saıyn óńirlerde memleket tarapynan qoldaý alyp isin ilgeriletip jatqan kásiporyndardyń jumysymen tanysyp otyrady. El ekonomıkasynyń kúretamyry sanalatyn Almatyda qor kómegine júginetinder kóp. Búginde memleket qoldaýyna ıe bolyp, onyń ishinde nesıeniń bir bóligin sýbsıdıa arqyly, ekinshiden ishinara kepildendirý arqyly, úshinshiden jeńildetilgen nesıe arqyly 1700-ge jýyq kásiporyn jalpy somasy 80 mlrd teńgege deıin qoldaý alyp óz jumysyn jandandyrýda. Olardyń ishinde otandyq ónimderdiń órisin keńeıtip júrgender az emes», deıdi «Damý» kásipkerlikti damytý qory» AQ-nyń Almaty qalasy boıynsha aımaqtyq fılıalynyń dırektory Jandos Baqytbekuly.

Jumyssyzdyq – elimizdegi ótkir problemanyń biri. Bul ásirese kún sanap halyq sany eselep ósip jatqan alyp megapolıs úshin basty máselege aınalǵan.

Eńbek naryǵyndaǵy jaǵdaı turaqtalyp keledi desek te, qaladaǵy jumyssyzdyq deńgeıi 5,1%-dy qurap otyr. Shahar bıligi jyl basynan beri 17,1 myń jumys orny, onyń ishinde 7,3 myń turaqty jumys orny qurylǵanyn málimdedi. Osy rette bıznesti qoldaýǵa baǵyttalǵan jobalar da jumyssyzdyq máselesin azaıtýǵa oń yqpalyn tıgizip otyr.