Almaty oblysynda 24 jastaǵy Janasyl Sársenbaidyń ólimine qatysty úsh jigit sot aldynda jaýap berip jatyr. Marqumnyń týystarynyń aitýynsha, qaiǵyly jaǵdai joldaǵy bolmashy janjaldan keiin bolǵan, dep habarlaidy dalanews.kz.
Oqiǵa osydan bes ai buryn Talǵar aýdanyndaǵy aýyldardyń birinde bolǵan. Tergeý nusqasyna sáikes, kúdiktiler Janasyl men onyń inisin úiine deiin kólikpen qýyp barǵan. Keiin olardyń biri Janasylǵa pyshaq jaraqatyn salǵan.
Jábirlenýshi aýrýhanaǵa jetkizilgenimen, dárigerler onyń ómirin saqtap qala almady.
Qazir is Qaskeleń qalasynda ashyq sot otyrysynda qaralyp jatyr. Aiyptalýshylar oryndyǵynda 19 jáne 20 jastaǵy úsh jigit otyr. Olardyń birine adam óltirdi degen aiyp taǵylsa, qalǵan ekeýi qylmysty jasyrý faktisi boiynsha jaýapqa tartylǵan.
Sotta aiyptalýshylardyń biri oqiǵanyń qalai bolǵanyn aityp bergen.
«Júrgizýshi bizge signal bere bastady. Elhan oǵan ainalyp ót degen belgi kórsetti. Janasyl Elhanǵa birdeńe aitty, boqtaǵan siiaqty, sodan keiin bizdi joǵary jyldamdyqpen ainalyp ótti. Biz olardyń sońynan bardyq. Úidiń aldyna jetkende kólikten tek Elhan shyqty. Ol Janasyldy pyshaqpen urdy. Sosyn maǵan: “Gazdy bas” dedi. Pyshaqty kórgende eseńgirep qaldym», – dedi aiyptalýshylardyń biri.
Marqumnyń týystary oqiǵanyń basqasha órbigenin aitady. Olardyń sózinshe, Janasyl inisimen birge ákesiniń ziratyna baryp kele jatqan. Qaitar jolda aýyldastary mingen kólik joldy jaýyp turǵan.
Janasyl kólik ielerine joldy bosatýdy surap, signal bergen. Alaida olar kólikti qozǵamaǵan. Osydan keiin ol jol jiegimen joǵary jyldamdyqpen ainalyp ótken. Týystary kúdiktilerdiń osy jaǵdaiǵa ashýlanyp, aǵaiyndy jigitterdiń artynan úiine deiin barǵanyn aitady.
Marqumnyń inisi Erkebulan Sársenbai da sotta oqiǵa sátin baiandady.
«Úsh adamnyń kólikten túskenin kórdik. Men jolaýshylar jaǵynda turdym. Eshqandai áńgime bolǵan joq. Kenetten Elhan aǵama eki ret pyshaq suqty: aldymen oń qolymen, keiin sol qolymen. Janasyl aýrýhanada kóz jumdy», – dedi ol.
Anasy eń qatań jaza surady
Sot otyrysynda marqumnyń anasy Almagúl Nurǵyzat ulynyń ólimine kinálilerdi keshirmeitinin aityp, olarǵa qatań jaza taǵaiyndaýdy surady.
«Ulym júgirip kelip: “Anashym, aǵamdy pyshaqtap ketti” dedi. Dalaǵa júgirip shyqtym. Janasyl tizerlep otyr eken. Ony qushaqtadym. Jedel járdem shaqyrdyq. Keiin ózimiz aýrýhanaǵa aparýdy sheshtik. Artynsha dárigerler: “Ulyńyz qaitys boldy” dedi. Men keshirmeimin. Mundaidy keshirý múmkin emes. Úsheýi de istegen isi úshin jazasyn alsyn. Ómiriniń sońyna deiin túrmede otyrsyn», – dedi marqumnyń anasy.
Jábirlenýshi tarap sottalýshylardan 100 million teńge kóleminde ótemaqy talap etken.
Is «Adam óltirý» jáne «Qylmysty jasyrý» baptary boiynsha qaralyp jatyr. Aiyp taǵylǵan tulǵalarǵa alty jyldan 15 jylǵa deiin bas bostandyǵynan aiyrý jazasy qaýpi bar.
