Aqtaýdaǵy ftiziopýlmonologiia ortalyǵynyń 90-ǵa jýyq qyzmetkeri mindetti kásiptik zeinetaqy jarnalarynyń ýaqytynda aýdarylmaýyna bailanysty zeinetke shyǵýda qiyndyqtarǵa tap bolǵanyn málimdedi, dep habarlaidy dalanews.kz.
Olardyń aitýynsha, ziiandy eńbek jaǵdaiynda jumys isteitin meditsina qyzmetkerlerine tólenýge tiis 5 paiyzdyq mindetti kásiptik zeinetaqy jarnasy 2014 jyldan beri aýdarylmaǵan. Sonyń saldarynan zeinet jasyna jetken mamandar qujattaryn rásimdeý kezinde túrli máselelerge kezigip otyr. Týberkýlezge qarsy dispanserde 37 jyl eńbek etken meiirbike Maira Zahanovanyń sózinshe, qyzmetkerler on jyldan astam ýaqyt boiy tiesili tólemnen qaǵylǵan.
Qyzmetkerler bul másele sanitarlarǵa da qatysty ekenin aitady. Olardyń málimetinshe, ziiandy eńbek jaǵdaiy úshin qarastyrylǵan tólem belgili bir kezeńde aýdarylǵanymen, 2026 jyldyń basynan bastap toqtatylǵan.
Al ortalyqtyń zańgeri Erjan Qonaev qoldanystaǵy zańnamaǵa sáikes mindetti kásiptik zeinetaqy jarnasy tek meditsinalyq bilimi bar jáne meditsinalyq qyzmet kórsetetin mamandarǵa tólenetinin túsindirdi. Onyń aitýynsha, sanitarlar bul sanatqa kirmeidi.
Sondai-aq zańger 2014 jylǵy normativtik qujattyń kúshi joiylyp, keiin jańa buiryqpen qaita bekitilgenin atap ótti. Qujatta ziiandy óndiristik jaǵdaida jumys ýaqytynyń keminde 80 paiyzyn ótkizetin meditsina qyzmetkerlerine ǵana jarna tóleý qarastyrylǵan.
Mamannyń aitýynsha, sanitarlarǵa sońǵy eki jylda aýdarylǵan jarnalar keiin qaitarylǵan. Alaida qyzmetkerler bul máselemen kelispei, ózderine tiesili dep esepteitin tólemderdi óndirip alý úshin zańgerlerdiń kómegine júginbek.
