Almatydaǵy Túrksib aýdanynyń ekonomıkasy turaqty ári serpindi damyp otyr. Bul týraly qala ákimi Erbolat Dosaev aýdan turǵyndarymen kezdesý barysynda aıtty. Qala basshysynyń aıtýynsha, negizgi kapıtalǵa salynǵan ınvestısıa 9 aıdyń ishinde 21%-ǵa, onyń ishinde jeke ınvestısıa 27%-ǵa ósken. Barlyǵy 150 mlrd teńge ınvestısıa tartyldy, – dep habarlaıdy Dalanews.kz Almaty qalasy ákiminiń baspasóz qyzmetine silteme jasap.

«Aýdanda jumys istep turǵan bıznes sýbektileriniń sany 7,8%-ǵa ósti. Búgingi kúni aýdanda 29 myńnan astam bıznes sýbektisi belsendi jumys istep jatyr, bul salyq túsimin 164 mlrd teńgege deıin ulǵaıtýǵa, sondaı-aq 3,5 myń jańa turaqty jumys ornyn ashýǵa múmkindik berdi», - dedi Erbolat Dosaev.

2024 jyly aýdannyń búdjeti ótken jylmen salystyrǵanda 4 ese ulǵaıdy. Máselen, 2023 jyldyń basynda búdjet 5,4 mlrd teńge bolsa, 2024 jyldyń basynda ol 21,3 mlrd teńgege jetti.

2024 jyldyń maýsymynda aýdan búdjeti taǵy 9%-ǵa ósip, 23,5 mlrd teńgege jetti, bul ınjenerlik jáne jol ınfraqurylymyn jańǵyrtýǵa, sondaı-aq qoǵamdyq keńistikterdi kóriktendirýge baǵyttalǵan jobalardy júzege asyrýǵa múmkindik berdi, dep atap ótti Almaty ákimi.

Aıta keteıik, Almaty qalasynyń ekonomıkasynda jalpy joǵary ınvestısıalyq belsendilik baıqalady.

Bıylǵy 9 aıdyń qorytyndysy boıynsha negizgi kapıtalǵa 1 133 mlrd teńge ınvestısıa tartylyp, ósim 8,1% boldy. 2024 jyldyń basynan beri jergilikti búdjetke túsim 27,2%-ǵa ósti, bul «Almatyny damytý baǵdarlamasy 2025 jylǵa deıin jáne 2030 jylǵa deıingi orta merzimdi perspektıvasy» aıasynda basym jobalardy qarjylandyrýdy ulǵaıtýǵa múmkindik berdi. 2024 jyldyń basynan bastap Almatynyń búdjeti 204,5 mlrd teńgege kóbeıip, 1 828,5 mlrd teńgege jetti.