Almatyda №10 qalalyq emhananyń direktory Gúlnara Qalibekova men “AkvaLab” JShS-niń óńirlik direktory Merýert Baimuhambetovaǵa qatysty qylmystyq is boiynsha sot úkimi shyqty, dep habarlaidy Dalanews.kz.
Belgili jýrnalist Mihail Kozachkovtyń málimetinshe, Qalibekovaǵa para alý boiynsha aiyp taǵylǵan. Sonymen qatar aiyptalýshylar qatarynda aqsha bergeni úshin jaýapqa tartylǵan “AkvaLab” JShS-niń óńirlik direktory Merýert Baimuhambetova da bolǵan.
“Gúlnar Zarqynbekqyzy byltyr kóktemde basshylyq qyzmetke taǵaiyndalǵan. Al 2025 jyldyń basynda emhana diagnostikalyq jáne zerthanalyq zertteýler júrgizý úshin eki kompaniiamen kelisimshart jasaidy. “AkvaLab” JShS jáne “OpenHealthcare Kazakhstan” JShS memlekettik mekeme naýqastarǵa qyzmet kórsetip, onyń aqysyn memleketten tegin meditsinalyq kómektiń kepildendirilgen kólemi aiasynda alyp otyrǵan”, — deidi jýrnalist.
Onyń sózinshe, zerthanalar jasaǵan barlyq taldaý “DamuMed” elektrondy júiesinde mindetti túrde tirkelýi tiis. Alaida tekseris barysynda júiege engizilgen derekterdiń bir bóligi shyndyqqa sáikes kelmeitini anyqtalǵan: keibir taldaýlar múlde jasalmaǵan nemese qajet bolmaǵan. Osylaisha zańsyz jolmen memleketten aqy alyp otyrǵan.
“Sol kezde emhana direktory zerthana ókilderine usynys jasaidy. Ol qasaqana joǵarylatylǵan kórsetkishterge kóz juma qaraidy, al zerthanalar oǵan memlekettik tapsyrys somasynyń 15 paiyzyn “syiaqy” retinde beredi”, — deidi ol.
Nátijesinde Qalibekova “AkvaLabtan” da, “OpenHealthcare Kazakhstan”- nan da qomaqty konvertter alyp otyrǵan. Para alý kezinde qolǵa túsip, keiin Baimuhambetovamen birge sotqa jiberildi.
“Al ekinshi zerthananyń ókili qaida ketkeni belgisiz. Bálkim, is boiynsha kýáger retinde ótken shyǵar”, — dep qosty jýrnalist.
Sotta eki tarap ta óz kinásin moiyndap, jaza retinde aiyppul taǵaiyndaýdy suraǵan.
“Osylaisha burynǵy sheneýnik biýdjetke 65 million teńgeden astam qarajat óteidi, al zerthananyń óńirlik direktory shamamen 24 million teńge tóleidi”, — dedi Kozachkov.
Jýrnalist azamattarǵa “DamuMed” júiesindegi jeke jazbalaryn tekserip otyrýdy eskertti.
“Sizge de qajetsiz, qymbat taldaýlar “taǵaiyndalyp” ketpesin. Kimniń jasaýy múmkin ekenin ózińiz túsinip otyrǵan bolarsyz”, — dedi ol.
