Almatynyń memlekettik aktivter basqarmasy burynǵy balabaqsha ǵimarattary men kombinattyń bir ǵimaratyn qalanyń menshigine qaitarmaq. Bul týraly Almaty qalasynyń memlekettik aktivter basqarma basshysynyń orynbasary Jantóre Aitjanov málimdedi,- dep habarlaidy Dalanews.kz
Jantóre Aitjanovtyń aitýynsha, jalǵa alý shartynyń basym bóligi buzylyp, qazir taraptardyń eki nysandy qaitarý úshin sottasyp jatqany málim boldy.
2002 jyldan bastap 11 jeke menshik pen arnaýly orta bilim berý mekemesine, atap aitqanda «Aq niet», «Elko», «Lider», «Arai», «Magistr», «Senim», «Kásipkerler mektebi», «Kógildir jelken», «Teremok», «Aigerim» men Almaty menedjment jáne servis kolledjine 10 balabaqsha men bir kombinat ǵimaraty jalǵa berilgen.
2020 jyldyń mamyr aiynda Almaty qalasynyń ákimi Baqytjan Saǵyntaev jeke uiymdarmen jasalǵan múlikti jalǵa berý sharttaryn kezeń-kezeńimen buzý týraly sheshim qabyldaǵan. Bul sheshim mektepke deiingi jańa uiymdardy qurý úshin qabyldanǵan bolatyn. Endi osy oqý oryndarymen jasalǵan barlyq jalǵa alý sharty qaita buzyldy.
2023 jyldyń maýsym aiynda «Arai» men «Senim» mekemesine nysandardy qaitarý týraly resmi habarlama joldanyp, shilde aiynda aradaǵy jalǵa alý sharty buzylǵanymen, olar nysandy bosatýdan bas tartqan edi. Osyǵan bailanysty Almaty qalasynyń Memlekettik aktivter basqarmasy Almaty qalasynyń Mamandandyrylǵan aýdanaralyq ekonomikalyq sotyna talap aryz berip, sot talapty qanaǵattandyrdy.
Sottyń sheshimine qaramastan, «Arai» men «Senim» mekemesiniń qyzmetkerleri bul nysandarda áli otyr. Almatydaǵy Ádilet departamentine olardy májbúrlep shyǵarý materialy tapsyryldy. «Arai» mekemesi ǵimaratty 2025 jylǵy 1 qyrkúiekke deiin bosatýdy keiinge shegerýin suraǵanymen, 3 shildede ótken sot oǵan kelisken joq.
Quqyqtyq rásim aiasynda 2025 jylǵy 14 pen 15 shildede Almaty qalasynyń Ádilet departamenti jańaǵy mekemelerdi nysannan shyǵara bastamaq.
Atalǵan nysandardy kommýnaldyq menshikke qaitarý men olardy qurylys-jóndeý jumysyna daiarlaý barysy zań sheńberinde iske asty.
