23 sáýirden bastap Almatydaǵy Raiymbek batyr dańǵylynda qaladaǵy eń iri kólik jobasynyń biri - BRT jelisin iske asyrý jumystary bastalady,- dep habarlaidy Dalanews.kz
Bul joba Almatyda alǵash ret kóshe keńistigin tolyq qamtyp, ǵimarattan ǵimaratqa deiingi aralyqty – jol, trotýar, jasyl aimaq pen ǵimarattardyń qasbetin – tolyǵymen qaita jańǵyrtýdy kózdeidi. Sonyń nátijesinde turǵyndar úshin yńǵaily ári zamanaýi qalalyq orta qalyptasady.
Joba úsh bólikke bólingen:
- Pýshkin kóshesi – Seifýllin dańǵyly (1,8 km)
- Seifýllin dańǵyly – Ahrimenko kóshesi (7,2 km)
- Ahrimenko kóshesi – Altyn Orda (7,5 km)
Merdigerler:
• 1 jáne 2 ýchaske – «Kazahdorstroi» JShS
• 3 ýchaske – «Progress KZ» JShS
Qurylys eki kezeńge bólingen:
I kezeń: 21 sáýirden maýsym aiyna deiin qurylys-montaj jumystary júrgiziledi. Bul kezeńde jol boiynda jumys bastalady: bir shetki oń jaq jolaq ýaqytsha jabylady, al ár baǵytta úsh jolaqpen qozǵalys saqtalady.
Osy kezeńde oryndalatyn jumystar:
• aryq jáne drenaj júiesin ornatý
• jańa aialdamalar ornatý
• sýarý júiesin tartý
• injenerlik jelilerdi kóshir
II kezeń: Maýsym aiynan bastap jańa asfalt tóselip, jol tańbalary syzylyp, baǵdarshamdar jańartylady. Sonymen qatar trotýarlar, jasyl aimaqtar, velosiped joldary, balalar jáne sport alańdaryn kóriktendirý bastalady.
Jol tósemi barlyq en boiynsha jańartylyp, qozǵalys ishinara 36 saǵatqa deiin jabylýy múmkin (kvartaldyq keste boiynsha). Osy kezde reversivti qozǵalys uiymdastyrylady. Mundai ýaqytsha qozǵalys shemasy ál-Farabi men Abai dańǵylyndaǵy ortasha jóndeý kezinde tiimdiligin kórsetti.
Qala turǵyndarynyń jailylyǵy qalai qamtamasyz etiledi?
Qurylys jumystary kezinde turǵyndar men qala qonaqtarynyń qolaisyzdyqty barynsha az sezinýi jáne qaýipsiz júrip-turýy úshin barlyq jaǵdai jasalady.
Jaiaý júrginshiler úshin:
• jóndeý ýchaskeleri boiymen yńǵaily jaiaý júrginshiler baǵyttary uiymdastyrylady;
• qorshaýlar, pandýstar jáne jaryq shaǵylystyrǵysh elementter ornatylady — bul túngi ýaqyttaǵy qaýipsizdik pen múmkindigi shekteýli azamattardyń qoljetimdiligin qamtamasyz etedi.
Qoǵamdyq kólikpen qatynaityn jolaýshylar úshin:
• jóndeý jumystary kezeńinde ýaqytsha aialdamalar qoiylady, olar negizgi marshrýttarǵa barynsha jaqyn ornalastyrylady.
Basty maqsat — qurylys júrip jatqan ýaqytta aýdan turǵyndarynyń ádettegi ómir yrǵaǵyn saqtaý.
Negizgi jumystardy 2025 jyldyń sońyna deiin aiaqtaý josparlanyp otyr.
Júrgiziletin jumystar, qozǵalysty ýaqytsha jabý jáne shemalardaǵy ózgerister týraly aqparat Almaty_Joly Telegram arnasynda, ákimdiktiń áleýmettik jelileri men 2GIS jáne Iandeks kartalarynda únemi jańartylyp otyrady. Bul dańǵyl qala men oblys arasyndaǵy mańyzdy kólik kúre tamyry bolǵandyqtan, aqparat qala mańy turǵyndaryna da jetkizilip otyrady.
