Almatydaǵy áigili «Jibek joly» bazary súrilýi múmkin. Sebep – nysannyń «qyzyl syzyqta» ornalasýy. Alaida bul sheshimge saýdagerler men kásipkerler úzildi-kesildi qarsy. Aitýlarynsha, eskertý qaǵazy nebári úsh kún buryn ǵana berilgen. Endi olar bilikten kemi bir jyl mursat surap otyr, dep habarlaidy Dalanews.kz.
Bazarda birneshe jyldan beri ashana jumysyn júrgizip kelgen Maral Jaqsylyqqyzy – jalǵyzbasty ana. Ol bul habardy aýyr soqqy dep baǵalap otyr. Aitýynsha, bazarda myńnan astam kásipker bar.
"Bir basymda alty kreditim bar. Úiim bankte kepilde tur. Ashanamdy tórt ai buryn 3,5 mln teńgege satyp alǵan edim. Jaidan-jai kete almaimyz. Oryn taýyp berse, bosatýǵa daiynmyn. Qazir jastar janarmai quiyp alyp, ózderin órteimiz dep júr", – deidi kásipker KTK arnasyna bergen suhbatynda.
Kólik bólshekterin satýmen ainalysatyndar da daǵdaryp otyr. Kópshiligine dúńgirshikterdiń súriletini jóninde aldyn ala esh eskertý jasalmaǵan.
"Biz zań buzyp jatqan joqpyz. Jumys istep, bala-shaǵamyzdy asyrap otyrmyz. Endeshe, nege bastapqyda ruqsat berdi? Endi kelip súrmek. Talap – tiispesin, jumys isteýge múmkindik bersin", – deidi kásipker Ábdirazaq Kenjebaev.
"Men bul jerde 10 jyldan beri avtoelektrik bolyp jumys istep kelemin. Zańdy túrde jalǵa alyp, salyq tólep otyrmyz. Bárimizde bankten alǵan nesiemiz bar. Kem degende kelesi jylǵa deiin qaldyrýyn suraimyz", – deidi Serihan Ermanhanuly.
Bazarǵa jýyrda ǵana taǵaiyndalǵan jańa direktor Azamat Qulmahanbettiń aitýynsha, bul aýmaqtaǵy nysandar tehnikalyq baiqaý stantsiiasynyń aýmaǵynda ornalasqan jáne zańdastyrylmaǵan.
"Keibir dúńgirshekter «qyzyl syzyqta» tur. Bizge bazardy tolyq modernizatsiialaý tapsyryldy. Sol úshin joba daiyndap jatyrmyz. Zań boiynsha eskertip jatyrmyz. Qazirdiń ózinde biraz kásipker shyǵarylyp úlgerdi", – deidi ol.
Sot sheshimi byltyr shyqqan
Sot oryndaýshylarynyń málimetinshe, bazardy buzý týraly sheshim 2023 jyly 4 sáýirde zańdy kúshine engen. Sodan beri birneshe ret eskertý berilgen.
"Ákimshilikke birinshi eskertý 26 mamyrda, ekinshisi 14 shildede jasaldy. Endi kásipkerlerge 11 tamyzǵa deiin ýaqyt berilip otyr", – deidi sot oryndaýshy Arnur Baqbergen.
Ákimdik ýáji men kásipkerlerdiń talaptary
Al qala qurylysyn baqylaý basqarmasynyń basshysy Álibek Tulbasievtiń aitýynsha, tekserý kezinde 30-ǵa jýyq nysan anyqtalyp, olarda ruqsat qujattary men jobalar bolmaǵan.
"Saraptamadan ótpegen, ruqsat qujattary joq nysandar. Sol úshin ákimshilik sharalar qoldanyldy", – deidi ol.
Degenmen kásipkerler ákimdik talapqa kelispeidi. Olar kem degende kelesi jylǵa deiin jumys isteýge múmkindik berýdi surap otyr. Áitpese, bul aýmaqtan ketpeýge bekingen.
