Almatydaǵy avtobýs apatyna kináli dep tanylǵan "5:32" serialynyń prodiýseri Anel Sartaevaǵa qatysty sot úkimi shyqty. Oǵan 2,5 jyl bas bostandyǵynan aiyrý jáne 5 jyl kólik júrgizý quqyǵynan aiyrý jazasy taǵaiyndaldy, - dep habarlaidy Dalanews.kz.
Sottalýshynyń kishkentai sábii bolýyna bailanysty jazanyń oryndalýy úsh jylǵa shegerildi.
Almaly aýdandyq sotynda kólik quraldaryn júrgizý kezinde jol qozǵalysy erejelerin buzyp, abaisyzda adam ólimine ákep soqqan (QK-niń 345-baby 3-bóligi) sottalýshy Sartaevaǵa qatysty qylmystyq is qaraldy.
Ol kólikti basqaryp, kóshe boiymen kele jatyp, «jol ber» belgisin elemei, jol bóligine shyǵyp ketip, avtobýspen soqtyǵysqany anyqtaldy. Soqtyǵystyń saldarynan avtobýs inertsiialyq jolmen baǵdarshamǵa soǵylyp, odan keiin trotýarǵa shyǵyp ketip, dúken ǵimaratyna soqtyǵysqan. Apat saldarynan avtobýs jolaýshysy K., jedel meditsinalyq járdem kelgenshe kóz jumdy.
Prodiýser óz kinásin tolyq moiyndap, jasaǵan isine ókinip, jas balasy bar bolǵandyqtan, bas bostandyǵynan aiyrmaýdy surady.
Sot úkimimen S. QK-niń 345-babynyń 3-bóligi boiynsha 2 jyl 6 aiǵa bas bostandyǵynan aiyrý jazasy taǵaiyndalyp, 5 jyl merzimge kólik quraldaryn basqarý quqyǵynan aiyrý jazasy taǵaiyndaldy.
