Búgin Almaty ákimi Darhan Satybaldy Halyqaralyq bilim berý korporatsiiasynyń (HBBK) jańa stýdenttik jataqhanasyn aralady. 339 orynǵa arnalǵan bul nysan korporatsiianyń bilim berý infraqurylymyn damytýǵa baǵyttalǵan aýqymdy baǵdarlamasynyń bir bóligi, dep habarlaidy Dalanews.kz
Jańa ǵimarattyń basty ereksheligi – jataqhana komfort-klass deńgeiinde salynǵan. Ár bólme jeke asúimen, sanitarlyq torappen jáne jumys aimaǵymen jabdyqtalǵan, bul stýdentterdiń turmysyn barynsha yńǵaily etip, apartament úlgisine jaqyndatady. Ǵimaratta birlesip oqý men jobalyq jumysqa arnalǵan kovorking aimaqtary qarastyrylǵan. Jataqhana «aqyldy kampýs» júiesine biriktirilgen, ol qaýipsizdik pen qoljetimdilikti ortalyqtan basqarýǵa múmkindik beredi. Jalpy aýmaǵy – 3 822,4 sharshy metr, investitsiia kólemi 15 mlrd teńgeden asty.
Sapar barysynda Almaty ákimi elimizge óz mamandaryn daiarlaý qajettigin atap ótti.
«Mańyzdysy – túlekterdiń eńbek naryǵynda básekege qabiletti bolýy. Qazir biz jii sheteldik mamandarǵa júginemiz. Qazaqstandyq mamandar joqtyń qasy. Sondyqtan ózimizdiń kadrlardy ósirip, olar qala igiligi úshin jobalardy júzege asyrýy qajet», – dedi Darhan Satybaldy.
Stýdentterdiń tájiribelik daiarlyǵy úshin HBBK bazasynda zamanaýi zertteý alańdary jumys isteidi. Olardyń qatarynda Samsung jáne JBL kompaniialarymen birlesken jobalar bar. Bul bolashaq arhitektorlarǵa, injener men dizainerlerge álemdik deńgeidegi qural-jabdyqta kýrstyq jáne diplomdyq jumystar oryndaýǵa múmkindik beredi.
Ýniversitet kampýsynda FabLab (Fabrication Laboratory), qalalyq zertteý zerthanasy, seismikalyq áserdi zertteýge arnalǵan biregei seismoplatforma, dron zerthanasy, qurylys geotehnikasy zerthanasy, sondai-aq O.Iu. Piak atyndaǵy jeldetý jáne konditsionerleý boiynsha mamandandyrylǵan zerthana jumys isteidi.
Aita keteiik, 2007 jyly qurylǵan Halyqaralyq bilim berý korporatsiiasynyń (HBBK) quramyna Qazaq bas sáýlet-qurylys akademiiasy (QazBSQA) jáne Qazaq-Amerika ýniversiteti (QAÝ) kiredi. Búginde korporatsiiada 16 myńnan astam stýdent oqyp jatyr. HBBK halyqaralyq baǵdarlamalardy damytyp, álemniń jetekshi ýniversitetterimen tyǵyz áriptestik ornatyp keledi.
