Almatyda Ulttyq ulannyń áskeri qyzmetshileri Jeńistiń 80 jyldyǵy qarsańynda 101 jastaǵy maidanger otstavkadaǵy polkovnik Qambar Sársenovtiń shańyraǵyna baryp, ardagerdi mereili merekesimen quttyqtady, dep habarlaidy Dalanews.kz
Keńes Odaǵynyń Batyry, gvardiia polkovnigi Baýyrjan Momyshuly atyndaǵy 5571 áskeri bóliminiń komandiri polkovnik Maqsat Baimaǵulov bastaǵan ulandyqtar jáne Ardagerler keńesiniń tóraǵasy zapastaǵy maior Berik Almaǵambetov Qambar Sársenovtiń shańyraǵyna arnaiy baryp, eseli eńbegi men ǵibratty ǵumyryn airyqsha atap, ardagerdi biyl atalyp ótetin Uly Jeńistiń 80 jyldyǵymen quttyqtady.
Kezdesý barysynda soǵys ardageri Qambar Ámirulyna Qazaqstan Respýblikasy Ulttyq ulany «Ońtústik» óńirlik qolbasshylyǵy qolbasshysynyń jáne Ardagerler keńesiniń atynan Alǵys hat pen syi-siiapat tabystady.
- Búgin biz Uly Otan soǵysynyń ardageri Qambar Sársenov aqsaqaldy quttyqtaýǵa keldik. Jyl saiyn ardagerge qurmet kórsetý bizdiń dástúrimizge ainaldy. Biz olardyń erlikterin úlgi etip, óskeleń urpaqty tárbieleimiz. Ókinishke orai, ardagerler azaiyp keledi. Sondyqtan biz árqashan olardy nazardan tys qaldyrmai, qamqorlyq tanytyp kóńilderin aýlaýǵa tyrysamyz, - dedi áskeri bólim komandiri polkovnik Maqsat Baimaǵulov.
Ór rýhty maidangerdiń terezesi astynda áskeri orkestr aty ańyzǵa ainalǵan «Jeńis kúni», «Slavianmen qoshtasý» marshtaryn, sondai-aq «Smýglianka» jáne «Katiýsha» kompozitsiialaryn oryndady. Ulandyqtar sondai-aq batyr ardagerdiń úiiniń aldynan saltanatty sherýmen júrip ótti.
Qambar Ámiruly áskerge 1942 jyly 12 tamyzda shaqyryldy. Ol soǵys jyldary úsh ret jaralandy. Kalinin oblysyn, Belorýssiiany, Latviiany, Litvany, Polshany azat etýge qatysty. Shyǵys Prýssiia men Germaniia jerinde soǵysty. Kenisbergte jaralanýyna bailanysty demobilizatsiialandy.
Otanǵa sińirgen eńbegi úshin Qambar Sársenov I jáne II dárejeli Uly Otan soǵysy, II jáne III dárejeli «Dańq», «Qyzyl Juldyz», «Jaýyngerlik eńbegi úshin», «Kenisbergti alǵany úshin», «Germaniiany jeńgeni úshin» orden-medaldarymen nagradtalǵan.
1980 jyly naýryzda IIM júiesinde 33 jyl jumys istegennen keiin zeinetke shyqty. Demalysqa shyqqannan keiin de Qambar Ámiruly Almaty energetika júiesine jumysqa ornalasty, onda taǵy on segiz jyl jumys istedi.
Sársen Qambar Ámiruly – QR IIM, Medeý aýdandyq ardagerler keńesiniń jáne energetika júiesiniń qurmetti ardageri.
