Almatyda Q.I. Sátbaev atyndaǵy Qazaq ulttyq zertteý tehnikalyq ýniversitetinde jańartylǵan stýdenttik jataqhananyń ashylý rásimi ótti. Bul tarihi ǵimaratta kezinde aty ańyzǵa ainalǵan «Dos-Muqasan» ansambli qurylǵan bolatyn. Qaita jóndeýden keiin «Dos-Muqasan uiasy» degen ataý ielenip, stýdentterge jańa baspana ǵana emes, ýniversitettiń mádeni murasyn aishyqtaityn orynǵa ainaldy,- dep habarlaidy Dalanews.kz
Jataqhananyń ashylý saltanatyna Almaty qalasy ákiminiń orynbasary Azamat Qaldybekov, ýniversitet rektory men oqytýshy-professorlar quramy, sondai-aq «Dos-Muqasan» ansambliniń ańyzǵa ainalǵan ókilderi – Dosym Súleev, Murat Qusaiynov, Ulyqpan Sydyqov jáne Meiirbek Moldabekov qatysty.
"Búgin Q.I. Sátbaev atyndaǵy Qazaq ulttyq zertteý tehnikalyq ýniversiteti úshin tarihi kún. Jataqhana oqý ornynyń qaramaǵyna qaitarylyp, paidalanýǵa tapsyryldy. Bul – Qazaqstan Respýblikasynyń Prezidenti Qasym-Jomart Toqaev jariialaǵan «Zań jáne tártip» qaǵidatynyń naqty oryndalýynyń aiǵaǵy. Ýniversitet basshylyǵyn, ustazdar men stýdentterdi osy qýanyshty oqiǵamen shyn júrekten quttyqtaimyn", – dedi Almaty qalasy ákiminiń orynbasary Azamat Qaldybekov.
Aita ketsek, birneshe ai buryn jataqhana sot sheshimimen ýniversitetke qaitarylǵan bolatyn. Sot jekeshelendirý boiynsha jasalǵan kelisimderdi zańsyz dep tanyp, ǵimaratty ýniversitet qaramaǵyna berý týraly qaýly shyǵardy. Osylaisha, «Dos-Muqasan» atymen bailanysty tarihi ǵimarat stýdentterge qaita buiyrdy.
Qazirgi tańda Almatyda 120-dan astam stýdentter úii paidalanýǵa berilgen. Sonymen qatar árbir joǵary oqý ornynda stýdentterdiń turmystyq máselelerin sheshýge arnalǵan ahýaldyq ortalyqtar jumys isteidi.
