Almatyda politsiia halyqaralyq shańǵy tramplinderi kesheniniń qurylysyna bailanysty kópjyldyq qarjylyq daýdy qaita tergeýdi talap etken qurylys kompaniiasynyń direktoryn ustady, dep habarlaidy Dalanews.kz Ulysmedia.kz-ke silteme jasap.
"Tolqurylys" JShS basshysy Ábdirazaq Baibolov qala prokýratýrasy ǵimaraty aldyna kelip, qylmystyq isti qaita jandandyrýdy talap etken. Kásipkerdiń aitýynsha, onyń kompaniiasy nysan qurylysyna qatysqanyna qaramastan, 15 jyldan beri atqarylǵan jumystar úshin qaryz ótelmei keledi.
Baibolov prokýratýra aldyna "Sana TV" JShS jetekshisi Aleksandr Vedenkomen birge kelgen. Olar qurylysqa qatysty qaryz áli kúnge deiin tólenbegenin jáne bul iske bailanysty qylmystyq istiń jyldar boiy sozylyp kele jatqanyn málimdedi. Kásipker tergeýdi qaita bastaý qajettigin aityp, bul iske tramplin salynǵan kezeńde Almaty ákiminiń orynbasary bolǵan, qazirgi Senat depýtaty Sultanbek Mákejanovtyń qatysy bolýy múmkin ekenin jetkizdi. Onyń sózinshe, senatordyń yqpaly saldarynan tergeý alǵa jyljymai otyr.
Alaida narazylyq aktsiiasyna prokýratýra ókilderi emes, politsiia qyzmetkerleri shyqqan. Quqyq qorǵaý organdary aktsiianyń zańsyz ekenin eskertip, Baibolovty Bostandyq aýdandyq politsiia bólimine jetkizdi.
Kásipkerdiń aitýynsha, tramplin qurylysyna qatysty qarjylyq zańbuzýshylyqtar jónindegi qylmystyq is birneshe ret ashylyp, keiin jabylǵan. 2024 jyly is qaita qozǵalǵanymen, Almaty prokýratýrasynyń ońtústik-shyǵys bólimshesiniń suraýy boiynsha júrgizilgen memlekettik saraptama teris qorytyndy shyǵarǵan. Keiin Baibolov Jambyl oblysynda qaita saraptama júrgizýge qol jetkizip, onda qurylys kezinde 1,7 mlrd teńge maqsatsyz jumsalýy múmkin degen qorytyndy jasalǵanyn aitty. Soǵan qaramastan, tergeý bul daýdy azamattyq-quqyqtyq sipattaǵy másele dep tanyp, sot arqyly sheshýdi usynǵan. Kásipker bul sheshimmen kelispei, qylmystyq is qozǵaýdy talap etýde.
Almaty qalalyq prokýratýrasynyń kezekshi prokýrory Alihan Týrgankýlov bul iske qatysty túsinikteme berýge quzyreti joq ekenin aitty. Al senator Sultanbek Mákejanovtyń kómekshisi depýtattyń issaparda ekenin habarlap, pikir alý múmkin bolmady.
Aita keteiik, Almatydaǵy halyqaralyq shańǵy tramplinderi kesheni 2011 jylǵy qysqy Aziia oiyndaryna orai salynǵan. Quny 20 mlrd teńgeden asqan jobaǵa qatysty qaryz jáne qarjylyq zańbuzýshylyqtar jónindegi daý on jyldan astam ýaqyttan beri túbegeili sheshimin tappai keledi.
