الماتىدا پوليسيا حالىقارالىق شاڭعى ترامپليندەرى كەشەنىنىڭ قۇرىلىسىنا بايلانىستى كوپجىلدىق قارجىلىق داۋدى قايتا تەرگەۋدى تالاپ ەتكەن قۇرىلىس كومپانياسىنىڭ ديرەكتورىن ۇستادى، دەپ حابارلايدى Dalanews.kz Ulysmedia.kz-كە سىلتەمە جاساپ.

"تولقۇرىلىس" ج ش س باسشىسى ءابدىرازاق بايبولوۆ قالا پروكۋراتۋراسى عيماراتى الدىنا كەلىپ، قىلمىستىق ءىستى قايتا جانداندىرۋدى تالاپ ەتكەن. كاسىپكەردىڭ ايتۋىنشا، ونىڭ كومپانياسى نىسان قۇرىلىسىنا قاتىسقانىنا قاراماستان، 15 جىلدان بەرى اتقارىلعان جۇمىستار ءۇشىن قارىز وتەلمەي كەلەدى.

بايبولوۆ پروكۋراتۋرا الدىنا "سانا تۆ" ج ش س جەتەكشىسى الەكساندر ۆەدەنكومەن بىرگە كەلگەن. ولار قۇرىلىسقا قاتىستى قارىز ءالى كۇنگە دەيىن تولەنبەگەنىن جانە بۇل ىسكە بايلانىستى قىلمىستىق ءىستىڭ جىلدار بويى سوزىلىپ كەلە جاتقانىن مالىمدەدى. كاسىپكەر تەرگەۋدى قايتا باستاۋ قاجەتتىگىن ايتىپ، بۇل ىسكە ترامپلين سالىنعان كەزەڭدە الماتى اكىمىنىڭ ورىنباسارى بولعان، قازىرگى سەنات دەپۋتاتى سۇلتانبەك ماكەجانوۆتىڭ قاتىسى بولۋى مۇمكىن ەكەنىن جەتكىزدى. ونىڭ سوزىنشە، سەناتوردىڭ ىقپالى سالدارىنان تەرگەۋ العا جىلجىماي وتىر.

الايدا نارازىلىق اكسياسىنا پروكۋراتۋرا وكىلدەرى ەمەس، پوليسيا قىزمەتكەرلەرى شىققان. قۇقىق قورعاۋ ورگاندارى اكسيانىڭ زاڭسىز ەكەنىن ەسكەرتىپ، بايبولوۆتى بوستاندىق اۋداندىق پوليسيا بولىمىنە جەتكىزدى.

كاسىپكەردىڭ ايتۋىنشا، ترامپلين قۇرىلىسىنا قاتىستى قارجىلىق زاڭبۇزۋشىلىقتار جونىندەگى قىلمىستىق ءىس بىرنەشە رەت اشىلىپ، كەيىن جابىلعان. 2024 جىلى ءىس قايتا قوزعالعانىمەن، الماتى پروكۋراتۋراسىنىڭ وڭتۇستىك-شىعىس بولىمشەسىنىڭ سۇراۋى بويىنشا جۇرگىزىلگەن مەملەكەتتىك ساراپتاما تەرىس قورىتىندى شىعارعان. كەيىن بايبولوۆ جامبىل وبلىسىندا قايتا ساراپتاما جۇرگىزۋگە قول جەتكىزىپ، وندا قۇرىلىس كەزىندە 1،7 ملرد تەڭگە ماقساتسىز جۇمسالۋى مۇمكىن دەگەن قورىتىندى جاسالعانىن ايتتى. سوعان قاراماستان، تەرگەۋ بۇل داۋدى ازاماتتىق-قۇقىقتىق سيپاتتاعى ماسەلە دەپ تانىپ، سوت ارقىلى شەشۋدى ۇسىنعان. كاسىپكەر بۇل شەشىممەن كەلىسپەي، قىلمىستىق ءىس قوزعاۋدى تالاپ ەتۋدە.

الماتى قالالىق پروكۋراتۋراسىنىڭ كەزەكشى پروكۋرورى اليحان تۋرگانكۋلوۆ بۇل ىسكە قاتىستى تۇسىنىكتەمە بەرۋگە قۇزىرەتى جوق ەكەنىن ايتتى. ال سەناتور سۇلتانبەك ماكەجانوۆتىڭ كومەكشىسى دەپۋتاتتىڭ ءىسساپاردا ەكەنىن حابارلاپ، پىكىر الۋ مۇمكىن بولمادى.

ايتا كەتەيىك، الماتىداعى حالىقارالىق شاڭعى ترامپليندەرى كەشەنى 2011 جىلعى قىسقى ازيا ويىندارىنا وراي سالىنعان. قۇنى 20 ملرد تەڭگەدەن اسقان جوباعا قاتىستى قارىز جانە قارجىلىق زاڭبۇزۋشىلىقتار جونىندەگى داۋ ون جىلدان استام ۋاقىتتان بەرى تۇبەگەيلى شەشىمىن تاپپاي كەلەدى.