Almatyda qalany sanitarlyq tazalaýdyń jańa júiesi engizilýde. Endi ár aýdanǵa bir merdiger bekitiledi. Ol kóshelerdiń, trotýarlardyń, aryqtardyń, aialdamalardyń jáne jasyl aimaqtardyń tazalyǵyna tolyq jaýap beredi. Bul týraly Almaty ákiminiń orynbasary Almashan Smatlaev Óńirlik kommýnikatsiialar qyzmetinde ótken brifingte málimdedi, dep habarlaidy Dalanews.kz
Kommýnaldyq qyzmetkerler sany eki esege artyp, 3175 adamǵa jetti. Jalaqy 170 myń teńgeden 350 myń teńgege deiin kóterildi. Táýlik boiy úsh aýysymdyq jumys kestesi engizildi, 300-den astam jańa tehnika alynyp jatyr.
«Buryn bir kóshede birneshe kompaniia qatar jumys istep, túsinispeýshilik týyndaityn. Endi «qasbetten qasbetke deiin» qaǵidatynyń engizilýi tártip pen úilesimdilikti joǵarylatady», – dedi Almashan Smatlaev.
Tekseristerdiń nátijesi boiynsha ákimdik tek qajetti resýrstary bar bes merdigermen ǵana jumysyn jalǵastyrady. Qalǵandary aýystyrylady. Mundai tásil qalanyń sanitarlyq jaǵdaiyn edáýir jaqsartyp, turǵyndar úshin qolaily orta qalyptastyrýǵa múmkindik beredi.
