Almatyda Respýblika alańynda Qańtar oqiǵasynyń qurbandaryna quran oqyldy
Jinalǵandar qaza bolǵandardyń rýhyna arnap quran baǵyshtap, jeti shelpek taratty. Ulysmedia.kz tilshisi de sonda. Alańnyń ainalasynda politsiia qyzmetkerleri baiqalmaidy.
2022 jyldyń 2 qańtarynda Jańaózende suiytylǵan gaz baǵasynyń kóterilýine qarsylyqtan bastaý alǵan jappai narazylyq birer kúnde Qazaqstannyń barlyq óńirin qamtyǵan edi. Birneshe qalada narazylyqtyń aiaǵy qantógiske ulasqan. Resmi málimet boiynsha, 238 adam kóz jumdy (onyń ishinde kúsh qurylymdarynyń 19 qyzmetkeri bar). Alty adam túrmede azaptaýdan kóz jumǵan.
Qazaqstanda Qańtar oqiǵasyna bailanysty myńdaǵan adam ustalyp, júzdegen adamǵa «terrorizm», «jappai tártipsizdikti uiymdastyrý», «qarý-jaraq saqtaý» syndy aiyptar taǵyldy. Ustalǵandardyń deni tergeý kezinde azaptalǵanyn málimdegen. Keiin ustalǵan, sottalǵandardyń kóbine raqymshylyq jasalǵan.
