Almatyda qoǵamdyq kólikterdi jańartý qolǵa alyndy
Almatyda eskirgen qoǵamdyq kólikterdi jańartý turǵysynda keshendi jumystar júrgizilýde. Qazan aiynyń aiaǵynda 103 baǵyty boiynsha jolaýshylar tasymaldaityn jańa avtobýs qatynai bastady. Al qarasha aiynyń basynda №65-shi baǵytta qatynaityn qoǵamdyq kólikter jańartyldy. Barlyq qoǵamdyq kólik «ońai» júiesimen jabdyqtalǵan.
«1 tamyzdan bastap biz ár taraptandyrylǵan tarifti qoǵamdyq kólikke engizdik. Sonyń arqasynda qazir bizdiń tasymaldaýshylardyń tabysy 90 paiyzǵa artty. Sonyń arqasynda bizdiń jeke tasymaldaýshylar 254 avtobýsty 6,5 milliard teńgege ózderiniń aqshalaryna satyp alyp jatyr» – dedi Almaty qalasy jolaýshylar kóligi jáne avtomobil joldary basqarmasynyń basshysy Maqsut ISAHOV.
Qalada kólik tasymalymen ainalysatyn jeke kompaniialar 254 avtobýsty óz qarjysyna satyp alǵan. Al memleket biýdjetinen 13 milliard teńgege 380 kólik alynyp jatyr. Mundai reforma damyǵan elderde osydan 35 jyl buryn júrgizilgen eken. Atalǵan jańashyldyq álemniń eń damyǵan 30 eliniń qataryna enýine múmkindik bermek.
«Álemdik naryqty salystyratyn bolsaq, qazirgi tańda mundai júie damyǵan memleketterdiń barlyǵynda bar. Barlyǵy júzege asyrylyp otyr. Aitalyq, «Ońai» júiesi Máskeýdikine óte uqsas. Ol jaqta da avtobýs árbir kóshelerine jolaq bólingen. Iaǵni, jyldam qatynaý maqsatynda. Osyndai júielerdiń barlyǵy Qazaqstanǵa ene bastady», – dedi ekonomist Maqsat SERALY.
Aldaǵy ýaqytta Almatyda qoǵamdyq kólikterge bólingen arnaiy jolaq sany arta túspek. Qazir onyń uzyndyǵy 95 shaqyrymdy quraidy. Kelesi jyly Rozybakiev kóshesinde Rysqulov dańǵylynan Toraiǵyrov kóshesine deiin qoǵamdyq kólik belgilengen jerden júretin bolady. Oǵan qosa, Áýezov kóshesinde Gogolden bastap Timiriazevqa deiin, Baitursynov kóshesinde Tóle biden Sátpaev kóshesine deiin arnaiy jolaq syzylmaq. Atap óterligi, qazan aiynda budan ózge 50 jańa avtobýs jetkizilgen. Olar № 50, 112 jáne 126-shy baǵyttar boiynsha jolaýshy tasymaldai bastady. Jyl aiaǵyna deiin qalanyń qoǵamdyq kóligi taǵy 530 jańa avtobýspen tolyqpaq. Almatyda transporttyq reforma kelesi jyldyń kóktemine deiin júrgiziletin bolady.
