Almatyda TikTok áleýmettik jelisinde qazaq qyzdaryna qatysty beiádep, qorlaityn sózder aitqan sheteldik strimerler 15 táýlikke ákimshilik qamaýǵa alyndy, dep habarlaidy Dalanews.kz.
Sot materialdaryna sáikes, atalǵan azamattar - Resei Federatsiiasynyń azamaty Anar Abdýllaev jáne Grýziia azamaty Renat Pashaev. Olar Qazaqstan aýmaǵynda turaqty turyp, TikTok platformasynda tikelei efirge shyǵyp, jazylýshylarymen erkin formatta sóilesý barysynda qoǵamda qabyldanbaǵan áreketterge barǵan.
Sot qaýlysynda:
«Pashaev R.A. TikTok áleýmettik jelisindegi tikelei efir jazbasynda qazaq ultynyń qyzdaryn talqylap, balaǵat sózder qoldanǵan» dep kórsetilgen. Dál osyndai tujyrym Resei azamaty Anar Abdýllaevqa qatysty da tirkelgen.
Atalǵan faktiler qoǵamda keń rezonans týdyrdy. Áleýmettik jeli qoldanýshylary shetel azamattarynyń áreketin ulttyq ar-namysqa tietin, ádepke jat qylyq retinde baǵalap, qatań jaýapkershilikke tartýdy talap etti.
Soǵan qaramastan, quqyq qorǵaý organdary bul áreketterdi usaq buzaqylyq retinde saralap, ákimshilik jaza qoldanýmen shektelgen. Bul jaǵdai qoǵamda birqatar suraq týyndatty.
Atap aitqanda, eger shetel azamattarynyń sózderinde ultaralyq arazdyqty qozdyrý belgileri bolǵan jaǵdaida, is Qylmystyq kodekstiń 174-baby boiynsha qaralýy múmkin edi. Atalǵan baptyń ekinshi bóliginde 5 jyldan 10 jylǵa deiin bas bostandyǵynan aiyrý jazasy kózdelgen.
Sonymen qatar, zańnamada shetel azamattaryn Qazaqstan aýmaǵynan májbúrlep shyǵarý tetikteri bar. Alaida, qoldanystaǵy normalarǵa sáikes, usaq buzaqylyq mundai negizderdiń naqty tizbesine kirmeidi.
Degenmen, qoǵamda sheteldik azamattardyń mundai áreketterine qatysty qatań shara qoldaný, sonyń ishinde elden shyǵarý jáne Qazaqstanǵa qaita kirýge uzaq merzimge tyiym salý qajet degen pikirler jii aitylýda.
