Almatyda iske qosylǵan arnaıy mobıldi brıgadalar 200-den astam janýarǵa shuǵyl veterınarlyq kómek kórsetti. Jobany Almaty qalasy kásipkerlik jáne ınvestısıalar basqarmasynyń «Almaty veterınarlyq qyzmeti» qolǵa alǵan,- dep habarlaıdy Dalanews.kz

Bul qyzmet bıyl 18 aqpanda bastaldy. Quramynda táýlik boıy jumys isteıtin eki mobıldi brıgada bar. Olar qıyn jaǵdaıda qalǵan janýarlarǵa alǵashqy kómek kórsetip, buryn bosatylǵan janýarlarǵa qutyrýǵa qarsy qaıta ekpe egýmen aınalysady.

Osy ýaqytqa deıin 223 janýarǵa kómek kórsetildi. Onyń ishinde 154 ıt, 64 mysyq, bir esek, bir jylqy, eki elik jáne bir úki bar. Sonymen qatar 1 259 ıtke qaıta ekpe egildi.

158 janýar saýyǵyp, óz mekenine qaıtaryldy. Al eki elik Almaty zoobaǵyna berildi.

Mamandardyń aıtýynsha, janýarlardyń jaǵdaıyn únemi baqylaý – olardyń qaýipsizdigin arttyryp, túrli aýrýlardyń taralýynyń aldyn alýǵa múmkindik beredi.