الماتىدا ىسكە قوسىلعان ارنايى ءموبيلدى بريگادالار 200-دەن استام جانۋارعا شۇعىل ۆەتەرينارلىق كومەك كورسەتتى. جوبانى الماتى قالاسى كاسىپكەرلىك جانە ينۆەستيسيالار باسقارماسىنىڭ «الماتى ۆەتەرينارلىق قىزمەتى» قولعا العان،- دەپ حابارلايدى Dalanews.kz
بۇل قىزمەت بيىل 18 اقپاندا باستالدى. قۇرامىندا تاۋلىك بويى جۇمىس ىستەيتىن ەكى ءموبيلدى بريگادا بار. ولار قيىن جاعدايدا قالعان جانۋارلارعا العاشقى كومەك كورسەتىپ، بۇرىن بوساتىلعان جانۋارلارعا قۇتىرۋعا قارسى قايتا ەكپە ەگۋمەن اينالىسادى.
وسى ۋاقىتقا دەيىن 223 جانۋارعا كومەك كورسەتىلدى. ونىڭ ىشىندە 154 يت، 64 مىسىق، ءبىر ەسەك، ءبىر جىلقى، ەكى ەلىك جانە ءبىر ۇكى بار. سونىمەن قاتار 1 259 يتكە قايتا ەكپە ەگىلدى.
158 جانۋار ساۋىعىپ، ءوز مەكەنىنە قايتارىلدى. ال ەكى ەلىك الماتى زووباعىنا بەرىلدى.
مامانداردىڭ ايتۋىنشا، جانۋارلاردىڭ جاعدايىن ۇنەمى باقىلاۋ – ولاردىڭ قاۋىپسىزدىگىن ارتتىرىپ، ءتۇرلى اۋرۋلاردىڭ تارالۋىنىڭ الدىن الۋعا مۇمكىندىك بەرەدى.
