Almaty qalasynda 1–10 sáýir aralyǵynda ótetin «Stop-buzýshylyq» jedel-profilaktikalyq is-sharasynyń bastalýyna orai politsiianyń keshendi jáne qosymsha kúshteriniń biryńǵai garnizondyq saptyq jiyny ótti, dep habarlaidy Dalanews.kz.
Is-sharaǵa Astana qalasynan, Aqmola, Qaraǵandy jáne Jambyl oblystarynan kelgen qosymsha kúshter tartyldy. Kúsheitý sharalary quqyq buzýshylyqtardyń aldyn alý tiimdiligin arttyrýǵa, qoǵamdyq tártipti qamtamasyz etýge jáne megapolistegi jol qozǵalysy qaýipsizdigin nyǵaitýǵa baǵyttalǵan.
Jeke quram aldynda sóz sóilegen Almaty qalasy Politsiia departamentiniń bastyǵy, politsiia general-maiory Aidyn Kabdýldinov barlyq bólimshelerdiń úilesimdi is-qimyly men zańdylyqty qatań saqtaýdyń mańyzdylyǵyn atap ótti.
«Politsiianyń árbir áreketi zańdy, ashyq ári kásibi bolýy tiis. Bizdiń basty mindetimiz – azamattardyń qaýipsizdigin qamtamasyz etý jáne quqyqtyq tártipti saqtaý», – dedi ol.
Operatsiia barysynda quqyq buzýshylyqtardyń aldyn alýǵa, arandatýshylyqtardyń jolyn kesýge jáne qoǵamdyq tártipti buzýdyń kez kelgen derekterine jedel áreket etýge erekshe nazar aýdarylady.
Garnizondyq saptyq jiyn tartylǵan barlyq kúshterdiń úilesimdiligin qamtamasyz etýde, tártipti nyǵaitýda jáne kúsheitilgen qyzmet atqarý jaǵdaiynda qoiylǵan mindetterdi oryndaýǵa daiyndyqty arttyrýda mańyzdy kezeń boldy.
«Stop-buzýshylyq» is-sharasyn ótkizý kriminogendik ahýaldy turaqtandyrýǵa, jol qaýipsizdigin qamtamasyz etýge, quqyq buzýshylyq deńgeiin tómendetýge, azamattardyń quqyqtyq sanasyn arttyrýǵa jáne qaýipsiz qalalyq orta qalyptastyrýǵa baǵyttalǵan.
