Almatyda Qala kúni merekesi jáne Halyq Qaharmany, Memlekettik syilyqtyń laýreaty, Qazaqstannyń eńbek sińirgen qairatkeri, kompozitor, dirijer ári kúishi Nurǵisa Tilendievtiń týǵanyna 100 jyl tolýyna orai memorialdyq mýzeide qaita jańǵyrtylǵan ekspozitsiia ashyldy,- dep habarlaidy Dalanews.kz
Almaty ákimi Darhan Satybaldy, kompozitordyń qyzy dirijer, Qazaqstannyń eńbek sińirgen qairatkeri Dinzýhra Tilendieva, sondai-aq ziialy qaýym men mádeniet ókilderi jańartylǵan mýzeidi aralap kórdi. Qala basshysy atap ótkendei, mýzeidiń jańarýy megapolistiń mádeni ómirindegi mańyzdy oqiǵa bolyp otyr.
1979-1998 jyldary kompozitor otbasymen turǵan bul úi búginde memorialdyq mýzei retinde jumys isteidi. Munda qazaq mýzykasynyń ozyq týyndylary dúniege kelgen, shyǵarmashylyq kezdesýler men repetitsiialar ótken sol kezeńniń atmosferasy saqtalǵan.
Jańǵyrtýdan keiin kórme zaldarynyń aýmaǵy 161 sharshy metrge deiin ulǵaidy. Mýzeige zamanaýi mýltimediialyq qurylǵylarmen jabdyqtalǵan eki jańa zal qosyldy. Sondai-aq, biregei qoljazbalar, arhivtik sýretter men kompozitordyń jeke zattarynan turatyn sirek ekspozitsiia usynyldy.
Ekspozitsiiadaǵy eń qundy jádigerdiń biri 1934 jyly Ahmet Jubanov syiǵa tartqan ańyzǵa ainalǵan «Dariǵa-dombyra». Kompozitordyń jary Dariǵa Tilendievanyń esimimen atalǵan qasietti dombyra onyń shyǵarmashylyq shabyt nyshanyna ainaldy. Sondai-aq, mýzeide kompozitordyń anasy syilaǵan fortepiano da saqtalǵan.
Buǵan deiin Almaty qalasy mýzeiler birlestigi Parijdegi IýNESKO shtab-páterinde uly qazaq kompozitorynyń murasyna arnalǵan mereitoilyq kórme ótkizgen bolatyn. Nurǵisa Tilendievtiń 100 jyldyǵy IýNESKO-nyń mereitoilyq datalar tizimine engizilip, qazaq mýzykasy danyshpanynyń álemdik mádenietke qosqan úlesi halyqaralyq deńgeide moiyndaldy.
