Almatyda meditsina qyzmetkeri jedel járdem kóliginde es-tússiz jatqan naýqastyń baǵaly buiymyn qoldy etken, dep habarlaidy Dalanews.kz agenttigi Almaty.tv arnasyna silteme jasap.
Densaýlyǵy nasharlaǵan áiel shuǵyl túrde aýrýhanaǵa jetkizildi. Sonda naýqastyń uly anasynyń moinynda quny 500 myń teńge turatyn altyn alqanyń joq ekenin baiqaǵan. Ol politsiiaǵa aryz jazǵan. Tártip saqshylary jedel járdem kóligindegi beinekamerany tekserý barysynda naýqastyń moinyndaǵy alqany feldsherdiń sheship jatqanyn kórgen.
Meditsina qyzmetkeri janynda adamdardyń joqtyǵyn paidalanyp, altyn alqany sheship, ony lombardqa ótkizip jibergen.
Sońǵy aqparattarǵa súiensek, naýqastyń qazirgi jaǵdaiy jaqsy. Urlanǵan alqa da iesine qaitaryldy. Al urlyq jasaǵan feldsher shuǵyl túrde jumystan shyǵaryldy.
“Atalǵan fakti boiynsha Túrksib aýdandyq ishki ister bólimi qylmystyq kodekstiń 188-baby 1-bóligine sáikes (Urlyq) sotqa deiingi tergeý amaldaryn bastady. Sol kúni feldsher ustalyp, beinejazba tárkilenip, sotqa deiingi tergeý amaldary júrgizildi”, – dedi Túrksib aýdany prokýratýrasynyń bólim bastyǵy Adlet Qýandyqov.
