الماتىدا مەديتسينا قىزمەتكەرٸ جەدەل جەردەم كٶلٸگٸندە ەس-تٷسسٸز جاتقان ناۋقاستىڭ باعالى بۇيىمىن قولدى ەتكەن, دەپ حابارلايدى Dalanews.kz اگەنتتٸگٸ Almaty.tv ارناسىنا سٸلتەمە جاساپ.
دەنساۋلىعى ناشارلاعان ەيەل شۇعىل تٷردە اۋرۋحاناعا جەتكٸزٸلدٸ. سوندا ناۋقاستىڭ ۇلى اناسىنىڭ موينىندا قۇنى 500 مىڭ تەڭگە تۇراتىن التىن القانىڭ جوق ەكەنٸن بايقاعان. ول پوليتسيياعا ارىز جازعان. تەرتٸپ ساقشىلارى جەدەل جەردەم كٶلٸگٸندەگٸ بەينەكامەرانى تەكسەرۋ بارىسىندا ناۋقاستىڭ موينىنداعى القانى فەلدشەردٸڭ شەشٸپ جاتقانىن كٶرگەن.
مەديتسينا قىزمەتكەرٸ جانىندا ادامداردىڭ جوقتىعىن پايدالانىپ, التىن القانى شەشٸپ, ونى لومباردقا ٶتكٸزٸپ جٸبەرگەن.
سوڭعى اقپاراتتارعا سٷيەنسەك, ناۋقاستىڭ قازٸرگٸ جاعدايى جاقسى. ۇرلانعان القا دا يەسٸنە قايتارىلدى. ال ۇرلىق جاساعان فەلدشەر شۇعىل تٷردە جۇمىستان شىعارىلدى.
“اتالعان فاكتٸ بويىنشا تٷركسٸب اۋداندىق ٸشكٸ ٸستەر بٶلٸمٸ قىلمىستىق كودەكستٸڭ 188-بابى 1-بٶلٸگٸنە سەيكەس (ۇرلىق) سوتقا دەيٸنگٸ تەرگەۋ امالدارىن باستادى. سول كٷنٸ فەلدشەر ۇستالىپ, بەينەجازبا تەركٸلەنٸپ, سوتقا دەيٸنگٸ تەرگەۋ امالدارى جٷرگٸزٸلدٸ”, – دەدٸ تٷركسٸب اۋدانى پروكۋراتۋراسىنىڭ بٶلٸم باستىعى ادلەت قۋاندىقوۆ.
