Jaqynda Almatydaǵy "Merkýr Taýers" turǵyn úiiniń kúzetshisin asqan jaýyzdyqpen óltirgen qylmyskerge qatysty tergeý toqtatylǵany belgili bolǵan edi. Alaida marqumnyń jaqyndary buǵan narazylyq bildirip, sot saraptamasymen kelispei otyr, dep habarlaidy Dalanews.kz.
Almaty prokýratýrasynyń málimetinshe, eks-depýtattyń uly psihikalyq aýytqýyna bailanysty arnaiy meditsinalyq uiymǵa jatqyzylǵan.
"Osy jyldyń naýryz aiynan bastap kúdiktige qatysty kisi óltirý faktisi boiynsha qylmystyq istiń tergep-tekserilip jatqanyn túsindiremiz. Sot psihologiialyq-psihiatriialyq saraptama qorytyndysynyń negizinde, QR QPK-niń 511-baby 2-bóligi 2) tarmaǵyna sáikes kúdikti psihitriialyq kómek kórsetetin, arnaiy meditsinalyq uiymǵa jatqyzyldy. Osyǵan bailanysty QR QPK-niń 45-baby 7-bóligi 4) tarmaǵy negizinde sotqa deiingi tergep-tekserý merzimi úzildi", - delingen aqparatta.
Kúdiktige shizofreniia diagnozy taǵaiyndalǵan.
Al marqumnyń jaqyndary sot saraptamasyna qarsylyq tanytyp otyr.
Marqumnyń anasy kúdiktiniń ata-anasy balasynyń janazasyn ótkizgennen keiin máseleni ózara sheshpek bolyp úilerine kelgenin aitady.
“Nurboldy jerlep jatqan kezde, advokatpyz dep eki jigit keldi. Nurboldy jerlep bitkennen keiin kesh bata bes adam keldi. Olardyń arasynda bir áiel, tórt erkek boldy. Kishi balamdy alyp ketip sóilespek bolǵanda ruqsat bermedim. Kelgender óltirgen balanyń áke-sheshesi eken. Týysqandar bolyp barlyǵymyz sóilestik”, - deidi ol Eýraziia arnasyndaǵy “Kóremiz” baǵdarlamasyna bergen suqbatynda.
Aitýynsha, qylmyskerdiń anasy oǵan aqsha usynǵan.
“Anasy menimen sóilesip, toǵyz jyl buryn qyzy qaitys bolǵannan keiin balasynyń aýyryp qalǵanyn aitty. Onyń eki qyzy men áieli bar ekenin jetkizdi. Aýyrady, derti bar demedi, qyzym qaitys bolǵan soń, balam birtúrli bolyp qaldy dep aitty. Sizge aqsha salaiyq, balańyzdyń qyrqyn ótkizip bereiik dedi. Men kelispedim”, – deidi marqumnyń anasy.
Eske salaiyq, jantúrshigerlik oqiǵanyń bolǵanyna bes ai ýaqyt ótti. Marqumnyń artynda eki ul, bir qyzy qaldy. Ol otbasyn asyraý úshin kúzetshi bolyp qyzmet eken. Munda nebári 150 myń teńge ailyq alǵan.
Al jazadan jaltaryp otyrǵan kúdikti Asqar Tastandiev – eks-depýtattyń uly. Onyń ákesi Salamǵazy Tastandiev 1994-1995 jyldary Joǵary Keńestiń depýtaty bolǵan. Sondai-aq bir kezderi Taldyqorǵan oblysynda prokýror bolyp jumys istegen.
