Almaty ákimi Erbolat Dosaev jumys sapary barysynda Áýezov aýdanynda jeke ınvestısıa esebinen ashylǵan jańa saýda-keńse ǵımaraty men arnaıy tehnıkany qurastyrý sehynyń jumysymen tanysty, dep habarlaıdy Dalanews.kz.
1,8 ga jer ýchaskesinde "Evrazıa ST" kompanıasy ǵımaratty rekonstrýksıalap, oǵan irgeles aýmaqty kóriktendirý jumystaryn júrgizdi. Jobanyń jalpy ınvestısıa kólemi – 3 mlrd teńge, bul 50 turaqty jumys ornyn ashýǵa múmkindik berdi.
Bıyl qazan aıynda kompanıa "Eurasia Special Machines" (ESM) komýnaldyq mashınalar men jabdyqtardy qurastyrý sehyn iske qosty. Munda joldardy kútip ustaý jáne tazalaý úshin ártúrli álemdik brendterdiń arnaıy kólik quraldary men jabdyqtaryn jınaý josparlanyp otyr.
Kompanıa bolashaqta tehnıka túrlerin kóbeıtip, jobalyq qýatqa shyqqanda jylyna 30 kópfýnksıonaldy "Pony P4" mashınalary, 50 sý sebý keshenderi, 30 qoqys tasıtyn mashına, 50 kóktaıǵaqqa qarsy materıaldardy taratatyn qural jáne basqa da tehnıkalar shyǵarady dep kútilýde.
Almaty kóshelerin sanıtarlyq tazalaýǵa jaýapty "Almaty Tazalyq" kásiporny birneshe elektrli ámbebap trotýar tazalaıtyn mashınalar, aralas jol tazalaý mashınalary jáne suıyq reagentterdi taratqyshtardy satyp aldy.
Keshen aýmaǵyn aralaý barysynda megapolıs basshysyna kanalızasıalyq qudyqtarǵa arnalǵan nemis óndirisiniń frezerlik tehnıkasy tanystyryldy.
"Biz bul tehnıkany uzaq kúttik. Barshamyzǵa belgili, qalada lúkterdiń aınalasyndaǵy asfált negizinen qolmen óńdeledi, al bul tehnıka jabyndyny dál mólsherde frezerlep, lúkterdi durys ornatýǵa múmkindik beredi. Bul eńbek ónimdiligin arttyrady. Árbir aýdan jáne joldardaǵy lúkterge qyzmet kórsetetin sý jáne jylýmen jabdyqtaý kásiporyndary osyndaı tehnıkamen jabdyqtalady. Qala úshin kóshelerdi tazalaýǵa, joldardy jóndeýge arnalǵan sapaly kópfýnksıonaldy tehnıkanyń bolýy mańyzdy", – dedi Erbolat Dosaev.
Sondaı-aq, bul baǵytta jumys isteıtin kásipkerlerge jan-jaqty qoldaý kórsetiletinin jetkizdi.
