الماتى اكىمى ەربولات دوسايەۆ جۇمىس ساپارى بارىسىندا اۋەزوۆ اۋدانىندا جەكە ينۆەستيسيا ەسەبىنەن اشىلعان جاڭا ساۋدا-كەڭسە عيماراتى مەن ارنايى تەحنيكانى قۇراستىرۋ سەحىنىڭ جۇمىسىمەن تانىستى، دەپ حابارلايدى Dalanews.kz. 

1،8 گا جەر ۋچاسكەسىندە "ەۆرازيا ست" كومپانياسى عيماراتتى رەكونسترۋكسيالاپ، وعان ىرگەلەس اۋماقتى كورىكتەندىرۋ جۇمىستارىن جۇرگىزدى. جوبانىڭ جالپى ينۆەستيسيا كولەمى – 3 ملرد تەڭگە، بۇل 50 تۇراقتى جۇمىس ورنىن اشۋعا مۇمكىندىك بەردى.

بيىل قازان ايىندا كومپانيا "Eurasia Special Machines" (ESM) كوممۋنالدىق ماشينالار مەن جابدىقتاردى قۇراستىرۋ سەحىن ىسكە قوستى. مۇندا جولداردى كۇتىپ ۇستاۋ جانە تازالاۋ ءۇشىن ءارتۇرلى الەمدىك برەندتەردىڭ ارنايى كولىك قۇرالدارى مەن جابدىقتارىن جيناۋ جوسپارلانىپ وتىر.

كومپانيا بولاشاقتا تەحنيكا تۇرلەرىن كوبەيتىپ، جوبالىق قۋاتقا شىققاندا جىلىنا 30 كوپفۋنكسيونالدى "Pony P4" ماشينالارى، 50 سۋ سەبۋ كەشەندەرى، 30 قوقىس تاسيتىن ماشينا، 50 كوكتايعاققا قارسى ماتەريالداردى تاراتاتىن قۇرال جانە باسقا دا تەحنيكالار شىعارادى دەپ كۇتىلۋدە.

الماتى كوشەلەرىن سانيتارلىق تازالاۋعا جاۋاپتى "الماتى تازالىق" كاسىپورنى بىرنەشە ەلەكترلى امبەباپ تروتۋار تازالايتىن ماشينالار، ارالاس جول تازالاۋ ماشينالارى جانە سۇيىق رەاگەنتتەردى تاراتقىشتاردى ساتىپ الدى.

كەشەن اۋماعىن ارالاۋ بارىسىندا مەگاپوليس باسشىسىنا كاناليزاسيالىق قۇدىقتارعا ارنالعان نەمىس ءوندىرىسىنىڭ فرەزەرلىك تەحنيكاسى تانىستىرىلدى.

"ءبىز بۇل تەحنيكانى ۇزاق كۇتتىك. بارشامىزعا بەلگىلى، قالادا ليۋكتەردىڭ اينالاسىنداعى اسفالت نەگىزىنەن قولمەن وڭدەلەدى، ال بۇل تەحنيكا جابىندىنى ءدال مولشەردە فرەزەرلەپ، ليۋكتەردى دۇرىس ورناتۋعا مۇمكىندىك بەرەدى. بۇل ەڭبەك ونىمدىلىگىن ارتتىرادى. ءاربىر اۋدان جانە جولدارداعى ليۋكتەرگە قىزمەت كورسەتەتىن سۋ جانە جىلۋمەن جابدىقتاۋ كاسىپورىندارى وسىنداي تەحنيكامەن جابدىقتالادى. قالا ءۇشىن كوشەلەردى تازالاۋعا، جولداردى جوندەۋگە ارنالعان ساپالى كوپفۋنكسيونالدى تەحنيكانىڭ بولۋى ماڭىزدى"، – دەدى ەربولات دوسايەۆ.

سونداي-اق، بۇل باعىتتا جۇمىس ىستەيتىن كاسىپكەرلەرگە جان-جاقتى قولداۋ كورسەتىلەتىنىن جەتكىزدى.