Almaty ákimi Darhan Satybaldynyń tapsyrmasymen qaladaǵy ǵimarattardyń syrtqy jáne sáýlettik jaryqtandyrý júiesin jańǵyrtý boiynsha aýqymdy jumys jalǵasyp jatyr. Baǵdarlamany iske asyrý qala kóshelerin anaǵurlym qaýipsiz ári qolaily etip, qoǵamdyq keńistikterdi kórkeitedi,- dep habarlaidy Dalanews.kz
Energetika jáne sýmen jabdyqtaý basqarmasynyń dereginshe, jyl sońyna deiin qaladaǵy 1189 aýmaqta 20 myńnan astam sham men torsher ornatylady. Jumys barlyq aýdandy qamtyp, kósheler tolyqtai jaryqtandyrylady. Qazirdiń ózinde Áýezov aýdanynda joba aiaqtalyp, Medeý aýdanynda jalǵasyn tapqan. Basqa aýmaqtarda da jumys qarqyn alǵan.
Sáýlettik jaryqtandyrýǵa da erekshe kóńil bólinip otyr. Biyl 70 ǵimarat pen áleýmettik nysannyń jaryq berý júiesi jańartylmaq. Qazir onyń 25-inde jumys tolyq aiaqtaldy, atap aitsaq, olar turǵyn úiler, mektepter, meditsinalyq mekemeler jáne joǵary oqý oryndarynyń ǵimarattary.
Darhan Satybaldy jaryqtandyrý júiesin damytý qalanyń turmys sapasymen tikelei bailanysty ekenin atap ótti.
«Sáýlettik jaryqtandyrý jumystaryn jedeldetip, kóshe shamdaryna qatysty barlyq nysandy qatań baqylaýǵa alý qajet. Bul tek kórkeitý emes, qala turǵyndarynyń qaýipsizdigi úshin de asa mańyzdy sharýa», – dedi ákim.
Jobanyń tiimdiligin arttyrý úshin «Almaty Qala Jaryq» kásipornynyń jumysyn kúsheitý jáne zamanaýi «aqyldy» tehnologiia engizý usynyldy. Ornatylyp jatqan shamdar Smart Lighting júiesine qosylýǵa múmkindik beretin arnaiy qurylǵylarmen jabdyqtalǵan. Bul bolashaqta jaryqtandyrýdy avtomatty túrde basqarýǵa jol ashady.
Ákim Energetika jáne sýmen jabdyqtaý basqarmasyna sáýlettik jaryqtandyrý boiynsha qalǵan ǵimarattarda jumysty jedeldetýdi, aýdan ákimdikterine resýrsty jumyldyryp, kóshe jaryǵynyń barlyq nysanyn erekshe baqylaýda ustaýdy tapsyrdy.
