19 naýryzdan bastap «Suńqar» TK aýmaǵy qorshalady, perimetri boiynsha 4 baqylaý-ótkizý pýnkti ornatylady. Turǵyn úi kesheninen turǵyndardyń eshqaisy kete almaidy, sondai-aq qonaqtardy qabyldai almaidy. Keshen turǵyndary óz turǵyn úiinen ketpeýi kerek, jerasty parkingine túsýge tyiym salynady.
– Bizdiń keshenniń turǵyndary úshin bir azyq-túlik dúkeni jumys isteidi. Sondai-aq, jetkizý ortalyqtarynan taýarlar men ónimderge tapsyrys berý kezinde jetkizilgen tapsyrystardy tórt BÓP-tiń birinde alýǵa bolady, bul týraly habarlanatyn bolady, – delingen áleýmettik jelilerde jariialanǵan habarlamada.
Keshenniń jumys isteitin barlyq turǵynyn jumys berýshilerinen qalyptasqan jaǵdai týraly eskertý suralǵan. Karantin 15 kúntizbelik kúnge sozylady jáne qajet bolǵan jaǵdaida uzartylady eken, bul týraly aldyn ala habarlanady.
– PIK, SES jáne ákimdik qyzmetkerleri páterlerde túsindirý jumystaryn júrgizedi. Karantin rejimin buzǵany úshin tártip buzýshylar qoldanystaǵy zańnamaǵa sáikes ákimshilik jáne qylmystyq jaýapkershilikke tartylady, – dep eskertti keshen ákimshiligi.
Óz kezeginde ákimdik ókilderi «Suńqar» TK aýmaǵynda qaýipsizdik sharalary DSU standarttaryna sáikes qabyldanǵanyn habarlady. Degenmen jergilikti turǵyndar arasynda taralý qaýpi bar.
– Juqtyrǵan adam boksqa ornalastyrylǵan. Birinshi jeliniń barlyq bailanysy oqshaýlandy. Endi karantin aimaǵy arqyly juqtyrý tizbegin toqtatý kerek, – dep túsindirdi ákimdiktegiler.
Sonymen qatar, ákimniń orynbasary Erjan Babaqumarovtyń habaryna qaraǵanda, Almatyda juqtyrý oshaqtary anyqtaldy. Onda dezinfektsiia júrgiziledi.
– Qalada koronavirýsty juqtyrý oshaqtary bar. Basty mindet - juqtyrý tizbegin úzý, karantin rejimin saqtaý, qalada virýstyń taralýyna jol bermeý jáne ony basqa óńirlerge eksporttaýǵa jol bermeý, – dedi Erjan Babaqumarov.
Juqtyrý oshaqtaryn oqshaýlaý quqyq qorǵaý organdarynyń, sanitarlyq-epidemiologiialyq qyzmettiń, meditsinalyq uiymdardyń, aýdan ákimdikteriniń jáne PIK-tiń kúshimen birlesip júrgizý josparlanǵan. Karantin kezeńinde oshaqtyń turǵyndaryna ózin-ózi oqshaýlaý qajet bolady. Juqtyrý oshaǵynyń aimaqtarynda baqylaý-ótkizý pýnkteri ornatylady. Karantin aimaǵynyń ishinde qozǵalysty shekteý kózdeledi.
Oshaqtyń aimaǵynda dúkender men dárihanalardyń jumysy, olarǵa qyzmet kórsetý boiynsha áleýmettik qyzmetkerlerge bekitilgen karantindelgen páterler/úilerge qyzmet kórsetý, qajettiligine qarai Meditsinalyq jáne avariialyq qyzmetterdi qosý qamtamasyz etiledi. Sondai-aq, aýdandyq ákimdikter halyqtyń áleýmettik osal toptaryna kiretin tulǵalarǵa kómek kórsetedi.
Eske salaiyq, Nur-Sultan men Almaty karantinge jabyldy. Sońǵy málimet boiynsha, Qazaqstanda koronavirýs juqtyrǵandar sany 36 adamǵa jetti. 18 naýqas Almatyda, qalǵan 18-si Nur-Sultanda.
