Almatyda «Genderlik zorlyq-zombylyqqa qarsy 16 kún belsendi is-qimyl» atty jyl saiynǵy respýblikalyq naýqany aiasyndaǵy alǵashqy aktsiia ótti. Bul basqosý stýdentterdi, túrli sala mamandaryn jáne quqyq qorǵaý organdarynyń ókilderiniń basyn qosyp, zorlyq-zombylyqtan qorǵaný, ózińdi jáne jaqyndaryńdy qaýipten saqtaý taqyrybyn talqylaýǵa múmkindik berdi, dep habarlaidy Dalanews.kz.
Aktsiiany Almaty qalasy Jumyspen qamtý jáne áleýmettik baǵdarlamalar basqarmasyna qarasty «Otbasyn qoldaý ortalyǵy» KMM, Almaty ákimi janyndaǵy Áielder isteri jáne otbasylyq-demografiialyq saiasat jónindegi komissiia, sondai-aq qalalyq politsiia departamenti uiymdastyrdy.
Is-shara Narhoz ýniversitetinde ótip, 100-ge jýyq adam qatysty. Ashyq dialog barysynda stýdentter suraq qoiyp, pikir almasty. Al mamandar daǵdarys jaǵdaiynda durys sheshim qabyldaý joldaryn, sondai-aq qandai jaǵdaida qai jerden kómek suraýǵa bolatynyn túsindirdi.
Aktsiia aiasynda Politsiia departamentiniń qyzmetkerlerimen ótken talqylaýlarda jastarǵa zorlyq-zombylyq qateri tóngen kezde qoldanylatyn naqty qorǵaný tásilderi men áreket etý tártibi egjei-tegjeili túsindirildi. Sonymen qatar psihologtar, áleýmettik qyzmetkerler men zańgerler keńes berip, jastarǵa saýatty qarym-qatynas ornatý, alǵashqy qaýip belgilerin baiqaý jáne qaýipti jaǵdaidy jasyrmai baiandaý jóninde usynystar aitty. Qatysýshylarǵa táýlik boiy qoldaý kórsetetin qyzmetter týraly da aqparat aityldy.
Jastar kezdesýge belsendi qatysyp, mundai is-sharalardyń jeke qaýipsizdikke qatysty máseleni jaqsyraq túsinýge septigin tigizetinin atady. Uiymdastyrýshylardyń aitýynsha, joǵary oqý oryndaryndaǵy osyndai aktsiialar jastardyń quqyqtyq saýatyn arttyryp, ózara qurmetke negizdelgen qaýipsiz qarym-qatynas mádenietin qalyptastyrýǵa yqpal etedi.
Aita keteiik, «Genderlik zorlyq-zombylyqqa qarsy 16 kún belsendi is-qimyl» respýblikalyq naýqany 10 jeltoqsanǵa deiin jalǵasady. Almatyda kezdesý, trening, dialog, aktsiia men kórme syndy 20-dan astam is-shara ótkizý josparlanyp otyr. Bul is-sharalarda áielder men balalardy qorǵaý máselesine, sondai-aq jastar arasynda zorlyqsyz minez-qulyq mádenietin damytýǵa erekshe kóńil bólinbek.
