Búgin Almaty qalasynda kórnekti opera ánshisi, akter, pedagog Ermek Serkebaevqa arnalǵan eskertkishtiń saltanatty ashylý rásimi ótti, – dep habarlaidy Dalanews.kz QR Mádeniet jáne aqparat ministrliginiń baspasóz qyzmetine silteme jasap.
Ashylý saltanatyna Mádeniet jáne aqparat ministri Aida Balaeva, Almaty qalasynyń ákimi Erbolat Dosaev, ánshiniń aǵasy Murat Serkebaev pen uly Baiǵali Serkebaev, sondai-aq shyǵarmashylyq ziialy qaýym ókilderi, qala turǵyndary men qonaqtary qatysty.
Eskertkish Abylai han dańǵylynyń boiynda, Qurmanǵazy atyndaǵy Qazaq memlekettik akademiialyq halyq aspaptary orkestri ǵimaratynyń aldynda ornatylǵan.
Ministr Aida Balaeva eskertkishtiń ashylýy eliniń uly perzentine degen qurmeti ekenin atap ótip, Ermek Serkebaevtyń bai rýhani murasy ult jadynda máńgi saqtalatynyna senim bildirdi.
– Ermek Serkebaev – sirek kezdesetin talant iesi, kásibi sheberligi joǵary mýzykant. Ol milliondaǵan ónersúier kórermenniń shynaiy mahabbatyna bólendi. Búgingi qazaq operasyn Ermek Serkebaevsyz elestetý qiyn. Onyń ǵibratty ǵumyry – mádenietimizdiń tarihyndaǵy tutas bir taraý. Kópshilik bilmeýi múmkin, biraq ol qoǵamdyq-saiasi ómirde de belsendilik tanytyp, Táýelsizdigimizdiń qalyptasýy men nyǵaiýyna zor úles qosty. Sonymen qatar, Ermek Bekmuhameduly daryndy mýzykanttar áýletiniń negizin qalady. Balalary men nemereleri onyń isin laiyqty jalǵastyryp, qazaq ónerin álemniń ár túkpirinde dáripteýde, – dedi Mádeniet jáne aqparat ministri.
Vedomstvo basshysy Ermek Serkebaevtyń beinesin qoladan somdaǵan músinshiler – Aidos Búrkitbaevqa, Timýr Ermuhametovke, Aqylbek Ormanbekovke jáne Qýanysh Asylbaiǵa erekshe alǵys bildirdi.
