Almaty qalasynda joǵary oqý oryndary men bilim berý mekemelerinde dini ekstremizm men terrorizmniń aldyn alý taqyrybynda aqparattyq-túsindirý is-sharalary ótti, dep habarlaidy Dalanews.kz.
Dini ekstremizm — bul dindi jeleý etip, zorlyq-zombylyqqa, óshpendilikke nemese qoǵamda iritki salýǵa baǵyttalǵan radikaldy kózqarastar men áreketter júiesi.
Qarapaiym tilmen aitqanda, dini ekstremizm — adamnyń nemese toptyń óz dini senimin basqalarǵa kúshtep tańýy, ózgeshe oilaityndarǵa qarsy shyǵýy, keide qylmystyq nemese terroristik áreketterge barýy.
Terrorizm — bul adamdardy qorqytý, úrei týǵyzý, qoǵam men memleketti destabilizatsiialaý (turaqsyzdandyrý) maqsatynda zorlyq-zombylyq jasaý nemese oǵan shaqyrý.
Qarapaiym túrde aitqanda, terrorizm — saiasi, dini nemese ideologiialyq maqsatqa jetý úshin qorqynysh pen kúsh qoldanýdy qural etý.
Terrorizmge qarsy kúres tek Qazaqstanda ǵana emes, búkil álemde qaýipsizdik pen turaqtylyqty qamtamasyz etýge baǵyttalǵan mańyzdy sharalardyń biri bolyp tabylady. Terroristik aktilerdiń saldary beibit turǵyndarǵa, ekonomika men qoǵamnyń áleýmettik turaqtylyǵyna zor ziian tigizedi.
Osy baǵytta Abai atyndaǵy Qazaq ulttyq pedagogikalyq ýniversitetiniń Tarih jáne quqyq fakýltetiniń oqytýshysy Nurlan Orynbekov Almaty qalalyq aqparattyq-túsindirý toby múshelerine arnalǵan eki kúndik seminarǵa qatysty. Seminarǵa Almaty qalasy Dini ister basqarmasynyń ókilderi, Ulttyq qaýipsizdik komiteti, Terrorizmge qarsy daiyndyq ortalyǵynyń mamandary jáne belgili qoǵam qairatkerleri qatysyp, óz tájiribelerimen bólisti.
Shara barysynda qatysýshylarǵa terrorizm aktisi oryn alǵan nemese onyń qaýpi týyndaǵan jaǵdaida qandai is-qimyl jasaý qajettigi túsindirildi. Túrkisib aýdandyq Ishki ister basqarmasynyń qyzmetkeri Qaiynbai Dastan Qanatuly arnaiy dáris ótkizip, shuǵyl evakýatsiia tártibi, kúmándi zattarmen jumys isteý erejeleri jáne jarylǵysh qurylǵy belgilerin ajyratý joldaryn egjei-tegjeili baiandady.
Sondai-aq, №1 Almaty qazaq memlekettik gýmanitarlyq-pedagogtik kolledjiniń oqytýshylary men stýdentteri terrorizmniń sebepteri men zardaptaryn talqylap, onyń aldyn alý baǵytyndaǵy sharalardyń mańyzyn atap ótti.
Al №178 mamandandyrylǵan litseidiń ujymyna Almaty qalasy Politsiia departamentiniń ekstremizm jáne terrorizmge qarsy is-qimyl bóliminiń aǵa leitenanty Bektur Ábýtálipov «Terrorizm aktisiniń qaýpi týyndaǵan jáne terrorizm aktisi jasalǵan jaǵdaidaǵy is-áreketter» taqyrybynda dáris oqydy.
Kezdesýge qatysqan ustazdar men mamandar balalar men jastar arasynda dini radikalizmniń aldyn alý úshin túsindirý jumystaryn júieli túrde júrgizýdiń mańyzdylyǵyn atap ótti.
Mamandardyń pikirinshe, ekstremizm men terrorizmniń aldyn alý — tek memlekettik qurylymdardyń emes, sonymen birge árbir azamattyń, ata-ananyń jáne pedagogtiń ortaq mindeti.
