Almaty qalasynyń Jetisý aýdanynda Jastar saiasaty basqarmasynyń qoldaýymen kezekti Career Day bos jumys oryndary jármeńkesi ótti. Is-sharaǵa belsendi jastar, aýdan turǵyndary, qoǵamdyq qairatkerler, sondai-aq komiýniti-ortalyqtardyń rezidentteri men 400-den astam kompaniianyń ókilderi qatysty, – dep habarlaidy Dalanews.kz
Almaty qalasy Jastar saiasaty basqarmasynyń málimetinshe, Career Day jobasynyń basty maqsaty — jastardy jumyspen qamtýǵa jáne mansap jolyn qurýǵa múmkindik berý arqyly olardyń kásibi bolashaǵyn qalyptastyrý. Almatynyń barlyq aýdandarynda ótip kele jatqan jármeńkelerdiń alǵashqy 7 kúninde 21 myńnan astam jas qamtyldy. Olardyń qatarynda mektep, kolledj jáne joǵary oqý oryndarynyń túlekteri bar.
«Bizdiń basty mindetterimizdiń biri – jastardy jumyspen qamtý jáne jan-jaqty damýyna múmkindikter ashý. Career Day – bul tek jármeńke ǵana emes, jastar arasyndaǵy jumyssyzdyqty azaitýdyń tolyqqandy áleýmettik quraly. Osyndai is-shara arqyly biz jastardy jetekshi kompaniialardyń ókilderimen kezdestirip, óz bolashaǵyna qadam jasai alatyndai múmkindik jasaimyz», — dedi Almaty qalasy Jastar saiasaty basqarmasynyń basshysy Aziz Kajdenbek.
Is-shara aiasynda arnaiy keńes berý aimaqtary uiymdastyrylyp, jumyssyz jastar HR-mamandarmen tikelei sóilesip, túiindemelerin qaldyryp, jeke keńester aldy.
«Men bul jármeńkege jai ǵana qarap shyǵaiyn dep kelgenmin. Biraq qalalyq mansap ortalyǵynyń qyzmetkerleriniń kómegimen jáne usynylǵan bos oryndardyń arqasynda ózime unaityn jumysqa ornalastym», — deidi jármeńke qatysýshysy Daýlet Imanov.
Aita keteiik, 2025 jyldyń basynan beri Almaty qalasynda 9 myńnan astam jas turaqty jumysqa ornalasqan. Qalalyq mansap ortalyǵynyń qyzmetterin qalanyń kez kelgen komiýniti ortalyǵynan paidalanýǵa bolady.
Kelesi Career Day jármeńkesi 2025 jyldyń 30 mamyr kúni Naýryzbai aýdanyndaǵy «Taý-Samaly» bazarynda ótedi.
